RFL
Kigali

Amahanga ntitwayatakira nayo araboroga: Sam Ndati yatabaje Imana mu ndirimbo 'Ibihe' yakomoye kuri Covid-19-VIDEO

Yanditswe na: Mupende Gedeon Ndayishimiye
Taliki:13/01/2022 13:34
0


Umuhanzi Sam Ndati yasohoye indirimbo nshya yise 'Ibihe' yanditse ashingiye ku bihe Isi yose ihanganyemo na Covid-19 imaze gutwara ubuzima bwa benshi, ndetse ikagira ingaruka ku baturage benshi hirya no hino ku Isi. Ni indirimbo yasohokanye n'amashusho yayo kuri uyu wa Gatatu tariki 12 Mutarama 2022.



Sam Ndati ni umusore utuye muri Kigali, mu Karere ka Gasabo, akaba ari umukristo muri Eglise Methodiste Lible Kicukiro. Mu mwaka wa 2018 ni bwo yatangiye umuziki akora indirimbo ye ya mbere nk'umuhanzi ku giti cye, ubu amaze kugeza indirimbo eshatu. Muri zo ndirimbo, iyo yatangiriyeho yitwa 'Igihozo cy'amarira', akurikizaho iyitwa 'Gukomera kwawe', ubu iyo yashyize hanze ariy nao nshya ni 'Ibihe' yasohokanye n'amashusho yayo.

Mu kiganiro na InyaRwanda.com, Sam Ndati yavuze ibihe yari arimo ubwo yandikaga iyi ndirimbo ye nshya 'Ibihe'. Yagize ati: "'Ibihe' ni indirimbo nakoze nshingiye ku bihe igihugu cyacu kirimo ndetse n'isi muri rusange, twugarijwe n'icyorezo cya Covid-19. Mu by'ukuri isi yose iri mu bohe bitoroshye. Nagize nti 'nubwo Ibihe bitoroshye twizeye ijambo ryawe Mana, kandi amahanga y'isi ntitwayatakira, nayo araboroga cyane yabuze uwayahoza, Mana Ganza i Rwanda, uduhoze amarira, kandi utegeke ibihe, birakumvira'".


Sam Ndati yashyize hanze indirimbo ye ya 3

Uyu muramyi utanga icyizere cy'ejo heza mu muziki wo kuramya no guhimbaza Imana, yavuze ko uyu mwaka wa 2022 ari umwana mushya agomba gukoramo cyane. Yizeza abakunzi b'umuziki wa Gospel ko abahishiye byinshi kandi byiza birimo indirimbo nshya nyinshi. Aragira ati "Murakoze cyane, icyo munyitegaho mbijeje, ni ugukomeza kubaha indirimbo, nziza kandi nyinshi. Hamwe n'lmana izabinshoboza. Mbabwira kandi ko inyuma hari ibyiza bindi ndi kubategurira. Murakoze umwaka mushya muhire wa 2022".

Muri iyi ndirimbo 'Ibihe', Sam Ndati aterura agira ati: "Nubwo ibihe bitoroshye twizeye ijambo ryawe. Ibihe birahita hakaza ibindi kandi bikarushaho kuba bibi. Ibyahise byadusigiye inkovu, Mana tabara rengera ubwoko bwawe. Ntare we ya Yuda banguka uturengere, ni wowe Mana yonyine yabasha gushyiraho iherezo. Amahanga y'Isi ntitwayatakira nayo araboroga cyane yabuze uwayahoze. Ntare ya Yuda, banguka uhagarike ibitavuga Imana byose". Amajwi y'iyi ndirimbo yakozwe na Winner Beatz, amashusho akorwa na Musafiri Pro.


Sam Ndati yatabaje Imana mu ndirimbo ye nshya 'Ibihe'

REBA HANO INDIRIMBO NSHYA 'IBIHE' YA SAM NDATI







TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND