Emmas & Salem Melodies bashyize hanze indirimbo 'Cana Umuriro' banakomoza ku mishinga ikomeye bafite mu 2022-VIDEO

Pastor Emmanuel Rwagasore (Emmas) ni umushumba w'Itorero New Jerusalem Ministries riherereye muri Canada mu mujyi wa Edmonton. Umugore we Salem asanzwe ari umuramyi. Tariki 18 Ukwakira 2020 ni bwo bahuje imbaraga batangira kuririmbana. Ni indirimbo banyuza kuri shene yabo ya Youtube bise Emmas & Salem Melodies'. Kugeza ubu bamaze gukora indirimbo 7 ari zo: "Nimuze", "Mube maso", "Isengesho/Ndashaka", "Mana humura", "Imigambi yawe", "Mana yo kwizerwa" na "Cana umuriro" bashyize hanze mu mpera za 2021.

Mu kiganiro na InyaRwanda.com, Pastor Emmanuel Rwagasore yadutangarije ko indirimbo yabo nshya 'Cana umuriro' bifuje kuyishyira hanze mu mpera z'umwaka wa 2021 na cyane ko 'ari bwo Umwuka w'Imana yayibahaye' nk'uko yabisobanuye ati "Cana Umuriro, impamvu twashatse kuyishyira hanze mbere y'uko umwaka urangira ni ukubera y'uko ari cyo gihe twayiherewe kandi Imana yayiduhishuriye nk'isengesho ryo kubwira abari mu Isi bose cyane cyane abatuye mu Rwanda ngo nibakomere haracyari ibyiringiro kuko dufite Imana y'imbaraga kandi ishobora kuzana ububyutse mu bana bayo".

Pastor Emmanul Rwagasore arashimira abakomeje gushyigikira no gukunda umuziki wa Emmas & Salem 

Yateguje abakunzi babo ibyiza byinshi mu 2022 birimo indirimbo nshya bazakorana n'abahanzi bakomeye barimo Nice Ndatabaye wamamaye mu ndirimbo 'Umbereye maso', Adonis Muco wamamaye mu ndirimbo 'Nzogera ku co yavuze', n'abandi, ndetse n'igitaramo gikomeye bateganya gukorera mu Rwanda. Ati "Abakunzi ba Salem na Emmas bagomba kwitegura kuko umwaka uza Imana idushoboje tuzagera mu Rwanda, tuzabakorera igitaramo kandi tuzaba turi kumwe n'bahanzi bakomeye cyane. Hamwe n'Imana byose birashoboka".

Yunzemo ati: "Ikindi ni uko umwaka uza hari abahanzi tuzaba turi gukorana indirimbo harimo Nice Ndatabaye, Adonis Muco. Indirimbo igiye gukurikiraho izaba ari iya Adonis Muco hamwe natwe, noneho izakurikiraho nyuma yaho azaba ari iya Nice Ndatabaye hamwe natwe. Kandi iyo ndirimbo ya Adonis hamwe natwe twamaze kuyikorera amashusho, mu kwezi kwa mbere niyo izaba iya mbere, niyo tuzabaha, hanyuma iya Nice Ndatabaye ndetse natwe birashoboka ko tuzayikora mu kwezi kwa kabiri".

Pastor Emmanuel Rwagasore (Emmas) yavuze ko hari ibindi byinshi byiza bahishiye abakunzi b'indirimbo zabo. Yasoje abwira abanyarwanda ko abakunda cyane ndetse ko we n'umugore we babana mu itsinda Emmas & Salem Melodies bakorwa ku mutima n'urukundo bakomeje kwerekwa n'abanyarwanda, akaba ari yo mpamvu nabo bafite amatsiko menshi yo kuzagera mu Rwanda bakabataramira mu gitaramo bateganya gukora mu mwaka wa 2022.

Emmas, Salem n'umwana wabo

Emmas & Salem Melodies bateguje abakunzi babo ibyiza byinshi mu 2022

REBA HANO INDIRIMBO NSHYA 'CANA UMURIRO' YA EMMAS & SALEM MELODIES