Ahabanza Imikino

Europa League 1/8: FC Barcelona izaterera umusozi w’i Naples – Uko tombola yagenze

Yanditswe na: SAFARI Garcon
Taliki:13/12/2021 15:46 0

FC Barcelona yatomboye Napoli muri 1/8 cya UEFA Europa League, irushanwa itari imenyereye na gato, aho iyi kipe yo mu Butaliyani yakubise agatoki ku kandi ihigira kuzatamaza aba banya-Espagne bari mu bihe bibi cyane.

Kuri uyu wa Mbere tariki ya 13 Ukuboza 2021, i Nyon mu Busuwisi habereye tombola ya 1/8 muri UEFA Europa League yasize umushyitsi muri iri rushanwa, FC Barcelona itomboye Napoli yo mu Butaliyani mu mukino uvuze byinshi ku makipe yombi.

Nyuma yo kwandagazwa mu mikino y’amatsinda muri Champions League, bikarangira ikipe ibaye iya gatatu mu itsinda ndetse ntibone amahirwe yo gukomeza muri iryo rushanwa, ahubwo ikerekeza muri Europa League, intego ya FC Barcelona ni ukwegukana iki gikombe gikomeye i Burayi.

Umukino ubanza uzabera I Camp Nou muri Espagne tariki ya 17 Gashyantare 2022, mu gihe uwo kwishyura uzabera mu Butaliyani tariki ya 24 Ukuboza 2022.

Indi mikino ikomeye izaba muri iri rushanwa harimo uzahuza RB Leipzig na Real Sociedad, Porto na Lazio, Atalanta na Olympiacos ndetse na Dortmund na Rangers.

Ikipe izegukana igikombe cya Europa League izamenyekana tariki ya 18 Gicurasi 2022, uyu mukino ukazabera muri Espagne ku kibuga cya Sevilla cya Ramón Sánchez Pizjuán.