Ntakintu nabona mbabwira! Bruce Melodie yasabye abakunda umuziki ikintu gikomeye, Fik Fameika arararika

Hashize amasaha meke umuhanzi Bruce Melodie ashyize kuri konti ye ya Instagram amashusho ari muri Kigali Arena, yereka abantu batandukanye ko yiteguye ndetse n’urubyiniro azaririmbiraho ko rwarangiye.

Inyuma ye hari abantu batandukanye bavugaga ko hahiye ndetse bamwe bamusaba kugira icyo yavuga, Bruce Melodie avuga ko nta kintu afite cyo kubwira abantu, ibintu byumvikanisha neza ko nta kintu afite cyo kuvuga igitaramo cy’amateka umunsi kizaberaho utaragera.

Mu Kiganiro InyaRwanda yagiranye n’umuhanzi Bruce Melodie, yavuze ko imyiteguro ari yose ndetse ko ibisabwa byose kugira ngo ahe abanyarwanda ibishimo byuzuye bihari, asaba abantu kwitabira igitaramo cy’amateka agiye gukorera muri Kigali Arena.

Yagize ati: “lbisabwa byose kugira ngo mpe ibyishimo abanyarwanda birahari ndetse mu mbaraga zose, gusa ndasaba abantu kuza kuko nziko ibyishimo bazabibona mu gitaramo cy’amateka ngiye gukora’’.

Bruce Melodie yagaragaje ko imyiteguro irimbanyije

Bruce Melodie kandi yagaragaje andi mashusho y’umuhanzi ukomeye mu gihugu cya Uganda, Fik Fameika, ari gusaba abantu kwitabira igitaramo cye nyuma y’abandi bahanzi bakomeye bagiye babikora barim Harmonize, Ben Pol, Ed Kenzo n’abandi.

Walukagga Shafik, umugande uzwi mu muziki nka Fik Fameica, yavuze ko aje kubwo gushimira umuhanzi Bruce Melodie ku myaka 10 bamaze mu muziki, asaba abantu kuzitabira igitaramo cye kizabera muri Kigali Arena.

Mbere y’uko umunsi nyirizina w’igitaramo ugera, Bruce Melodie akomeje kwifashisha imbuga nkoranyambaga ze, agaragaza abahanzi bazamufasha mu gitaramo cye.

Mu ijoro ry’uyu wa Gatatu tariki 3 Ugushyingo 2021, yagaragaje ko umuhanzikazi Alyn Sano uherutse gusohora indirimbo ‘Setu’ yiyongereye kuri Riderman, Bull Dogg, Mike Kayihura, Inganzo Ngari, Christopher, Niyo Bosco na Papa Cyangwe yari yatangaje mbere. Hari kandi Dj Marnaud na Dj Toxxyk.

Fik Fameika yasabye abakunzi b'umuziki gushyigikira Bruce Melodie

Ni mu gihe kandi mu ijoro ry’uyu wa Gatatu, Umuhanzi w’umunya-Tanzania Harmonize na Eddy Kenzo batangaje ko bishimiye Bruce Melodie ugiye gukora igitaramo cyo kwizihiza imyaka 10 ishize ari mu muziki.

Harmonize ukurikirwa n’abantu barenga miliyoni 7 na Eddy Kenzo ukurikirwa n’abantu barenga miliyoni 1 kuri Instagram, bagaragaye mu mashusho yashyizwe ku mbuga nkoranyambaga za Bruce Melodie, bavuga ko batewe ishema n’intambwe yateye mu muziki.

Aba bahanzi bise Bruce Melodie ‘umuvandimwe wabo’ basaba buri wese kuzamushyigikira [Hari n’aho bamwita umwami], mu gitaramo azakorera muri Kigali Arena.

 

Fik Fameika ni umuhanzi w'umuhanga