Hagiye gushingwa igikombe cyitiriwe Diego Maradona

Iki gikombe cyiswe Maradona Cup, giteganyijwe kubera muri Saudi Arabia tariki 14 Ukoboza uyu mwaka aho ikipe ya FC Barcelona izahura na Boca Juniors mu buryo bwo kwibuka uyu kizigenza waranze amateka y'umupira w'amaguru ku Isi.

Maradona yitabye Imana tariki 25 Ugushyingo mu mwaka ushize

Uyu mukino uzabera kuri sitade ya Mrsool Park ibarizwa muri Saudi Arabia ikaba yakira abafana bagera ku bihumbi 25 bicaye neza. Barcelona na Boca Juniors ni amwe mu makipe Maradona yagiriyemo ibihe byiza ndetse banishimira umusaruro we. Umukino biteganyijwe uzanyura kuri televiziyo ya Barcelona.

Maradona ubwo yakiniraga Boca Junioirs 

Maradona yakiniye Boca Juniors bwa mbere mu mwaka w'imikino 1981/82 atwara igikombe cya Metropolitano. Yagarutse muri Boca Juniors 1995-97 aho yayikiniye imyaka ibiri mbere yo gusezera kuri ruhago. Maradona kandi yakiniye Barcelona imyaka ibiri kuva 1982/84 ayikinira imikino 58 atwara ibikombe birimo Copa del Rey, Spanish Super Cup, ndetse na Spanish League Cup.

Maradona yabaye umwe mu bakinnyi isi yagize 

Barcelona na Boca Juniors zimaze guhura inshuro 10 mu mateka yazo, aho ziheruka gucakirana mu 2018 mu gikombe cyitwa Joan Hamper Trophy Barcelona itsinda Boca Juniors ibitego 3 ku busa.