Abasore bariteguye kandi batwijeje intsinzi ku Cyumweru – Ambasaderi Rutabana

Kuri iki Cyumweru biraza kuba ari ibicika ku kibuga St Mary Kitende, aho Uganda iza kuba yakiriye u Rwanda mu mukino wo kwishyura mu itsinda rya E mu gushaka itike y’igikombe cy’Isi cya 2022, nyuma y’iminsi itatu amakipe ahuriye i Kigali.

Tariki ya 07 Ukwakira 2021, Uganda yatsindiye u Rwanda i Kigali igitego 1-0, cyababaje imbaga y’Abanyarwanda bifuzaga intsinzi imbere y’iki gihugu bahora bahanganye bitari mu mupira w’amaguru gusa.

Nyuma y’umukino, Amavubi yahise afata indege yerekeza muri Uganda gutegura umukino wo kwishyura uteganyijwe kuri iki Cyumweru, i Kitende.

Kuri uyu wa Gatanu tariki ya 08 Ukwakira 2021, Amb. Joseph Rutabana uhagarariye u Rwanda muri Uganda, yasuye iyi kipe, maze imwizeza intsinzi, nawe ababwira ko Abanyarwanda babari inyuma.

Mu butumwe yanyujije ku rukuta rwe rwa Twitter, yagize ati”Abasore biteguye kubikora ku Cyumweru! Babidusezeranyije, kandi natwe turahari kugira ngo tubashyigikire. Birashoboka…”.

Nyuma yo gutsindirwa i Kigali na Uganda 1-0, Amavubi ari ku mwanya wa nyuma mu itsinda E n’inota rimwe mu mikino itatu, aho rwanganyije na Kenya i Kigali 1-1, rugatsindwa imikino ibiri, harimo uwa Mali 1-0 n’uwa Uganda 1-0.

Iri tsinda riyobowe na Mali ifite amanota arindwi, Uganda ifite amanota atanu mu gihe Kenya ifite amanota abiri.

Bisa nkaho u Rwanda rwamaze kuva muri kuruse yo gushaka itike y’igikombe cy’Isi nyuma yo gutsindwa na Uganda, gusa Abatoza n’Abakinnyi b’Amavubi biyemeje guhatana bagakura intsinzi muri Uganda nubwo benshi babifata nk’ibidashoboka cyangwa bigoye cyane kuba byashoboka.

Ambasaderi Rutabana yasuye Amavubi mu myitozo, amwizeza intsinzi

Ambasaderi Rutabana aganira n'abatoza b'Amavubi

Ambasaderi Rutabana yasabye abakinnyi ubwitange ku mukino wa Uganda, nabo bamwizeza intsinzi