Kigali
-->

Ku nshuro ya mbere Donald Trump yavuye ku rutonde rw'abaherwe 400 bakomeye ku isi

Yanditswe na: Nadia Kangabe
Taliki:7/10/2021 10:29
0

Donald Trump umuherwe kabuhariwe wahoze ayobora Leta Zunze Ubumwe za Amerika ntakibarizwa ku rutunde rw'abaherwe 400 bakize cyane ku isi. Ibi bikaba bibaye ku nshuro ya mbere mu myaka 25 ishize hakorwa uru rutonde.



Donald Trump umuherwe wagannye inzira ya politiki ikamuhira akayobora igihugu cy'igihanganye cya Leta Zunze Ubumwe za Amerika mu gihe cy'imyaka 4, ibi byamwongereye gukomera no gukomeza kwinjiza amafaranga menshi. Bitunguranye Donald Trump yaje kuva ku rutonde rw'abaherwe 400 bakomeye ku isi, uru rutonde rukaba rukorwa buri mwaka aho rugaragaza uko imitungo y'abakire ihagaze rukaba rukorwa n'ikinyamakuru kabuhariwe mu ibarura ry'imitungo Forbes.


Nk'uko Forbes yabitangaje yerekanye urutonde rw'abaherwe 400 bakomeye ku isi gusa Donald Trump ntarubarizwaho bitewe n'uko yasubiye inyuma mu mitungo. Ubusanzwe uru rutonde usanga ruhuriyeho abanyamiliyarideli. Kuri ubu Donald Trump akaba atakibabarizwamo aho yavuye mu banyamiliyarideli agasubira mu cyiciro cy'abatunze miliyoni y'amadorali.


Umwaka ushize wa 2020 ubwo hakorwaga uru rutonde, Donald Trump yaje ku mwanya wa 339 mu baherwe 400 aho yari afite umutungo ungana na miliyari 2.5 z'amadolari. Kugeza ubu uyu mutungo waragabanutse ugera kuri miliyoni 600 z'amadolari. Forbes ikaba yatangaje ko kuba umutungo wa Donald Trump warasubiye inyuma ahanini byatewe n'ibikorwa byinshi bya Trump byahagaritse gukora mu gihe cya Covid-19, ibi bikorwa birimo ama hoteli n'ibibuga byo gukiniraho Golfe byamwinjirizaga amafaranga menshi.


Iyi ikaba ibaye inshuro ya mbere mu myaka 25 Donald Trump atagaragaye ku rutonde rw'abaherwe 400 bakomeye ku isi. Uru rutonde rukaba rwaratangiye gukorwa kuva mu 1982 kugeza n'ubu rugikorwa. Kuri ubu abakire baruyoboye harimo Jeff Bezos, Elon Musk, Bernard Arnault, Bill Gates, Warren Buffet, Larry Ellison hamwe na Mark Zuckerberg.






TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND