U Rwanda rwatsinzwe na Ethiopia i Kigali, amahirwe yo kujya mu gikombe cy’Isi arayoyoka

Kuri uyu wa Gatanu tariki ya 24 Nzeri 2021, kuri Stade ya Kigali i Nyamirambo habereye umukino w’u Rwanda na Ethiopia mu bakobwa batarengeje imyaka 20, mu ijonjora rya kabiri mu gushaka itike y’igikombe cy’Isi kizabera muri Costa Rica, warangiye ikipe y’igihugu y’u Rwanda itsinzwe ibitego 4-0.

Muri uyu mukino u Rwanda rwagaragaje urwego ruri hasi cyane kuko Ethiopia yihariye umukino, irusha gukina neza u Rwanda kuva umukino utangiye kugeza usojwe.

Uku kwitwara nabi kw’ikipe y’u Rwanda, ahanini byatewe no kuba abakinnyi badaheruka gukina, kuko hashize umwaka n’igice shampiyona y’abagore yarahagaze, bakaba nta marushanwa baheruka gukina, ndetse nibwo bwa mbere u Rwanda rugize ikipe y’igihugu y’abakobwa batarengeje imyaka 20.

Ethiopia yarushije u Rwanda ku buryo bugaragara, yafunguye amazamu ku munota wa 20, ku gitego cyatsinzwe na Assresahagn Matios wazonze cyane u Rwanda. Uyu mukinnyi yaje gutsinda n’igitego cya kabiri ku munota wa 27, iminota 45 y’igice cya mbere irangira Ethiopia iri imbere n’ibitego 2-0.

Ikipe y’igihugu ya Ethiopia yagarutse mu gice cya kabiri gahunda ari ugushaka ibitego byinshi, aho ku munota wa 55 Kalsa Tadesse yatsinze igitego cya gatatu, mu gihe Lema Tone yatsinze igitego cya kane cy’agashinguracumu ku munota wa 61, ari nako umukino warangiye.

Nyuma yo gutsindwa umukino ubanza ibitego 4-0, amahirwe y’u Rwanda yo gukomeza mu cyiciro gikurikiyeho yayoyotse kuko kuzakura amanota atatu muri Ethiopia byagorana cyane mu mukino wo kwishyura.

Umukino wo kwishyura uteganyijwe tariki ya 9 Ukwakira 2021 muri Ethiopia.

U Rwanda rwatsinzwe na Ethiopia mu bangavu batarengeje imyaka 20 ibitego 4-0 i Kigali