Kigali

Ni muntu ki wavukiye i Goma ubu akaba akinana na Steph Curry muri NBA?

Yanditswe na: SAFARI Garcon
Taliki:31/07/2021 11:26
0

Jonathan Kuminga w’imyaka 18 wavukiye i Goma muri Repubuluka Iharanira Demokarasi ya Congo, yanditse amateka akomeye cyane nyuma yo gutoranywa n’ikipe ya Golden State Warriors y’icyamamare Stephen Curry bagiye gukinana mu ikipe imwe bambaye umwambaro umwe.



Kuminga yabaye umukinnyi wa gatandatu uvuka muri DR Congo winjiye muri shampiyona ya basketball ya NBA muri Amerika nyuma y'uko atoranyijwe na Golden State Warriors mu mpera z’iki cyumweru.

Mu mujyi wa Goma, umwe mu basore bakinye Basketball bazi Jonathan Kuminga ari muto, yatangaje ko bibateye ishema ariko we bitamutunguye kuko yari impano idasanzwe kuva akiri muto.

Kuminga yatoranyijwe ku mwanya wa karindwi ari uwa mbere wa Warriors, avanywe mu ikipe ya G League Ignite nayo yo muri leta ya California ikina mu irushanwa rya G-League.

Amaze gutoranywa, uyu musore w'imyaka 18 wavukiye i wa Goma yagize ati:

"Igihe cyose nzakurira iruhande rwa Steph Curry, Klay [Thompson], Draymond Green, ndumva umukino wanjye ugiye kuva hasi ukagera hejuru mu mezi macye".

Afatwa nk'umukinnyi uharaze (athletic) kurusha abandi batoranyijwe, ni umuhanga mu gutsinda no gukinana n'abandi, afite n'amahirwe yo gukura akavamo uwugarira neza.

Iwabo i Goma, arazwi cyane mu bakina n'abakurikira Basketball ubwo yakinaga mu cyiciro cy'abana arangwa n'ubuhanga budasanzwe mu gusimbuka no kudunda umupira.

Yagize amahirwe, mu 2016 ataruzuza imyaka 14, akurikira mukuru we Joel Ntambwe muri Amerika wari warabonyeyo 'bourse/scholarship' ya National Collegiate Athletic Association (NCCA).

Ubuhanga bwa Kuminga muri basketball bwatumye abona umwanya mu bigo by'amashuri yisumbuye muri West Virginia, New York na The Patrick School muri New Jersey yakiniye mbere y'uko ajya muri G League Ignite y'ababigize umwuga.

Umwaka ushize w'imikino ya G-League, Kuminga yagize ikigereranyo cyo gutsinda amanota 15.8 ku mukino, 7.2 'rebounds', 2.7 assists, kandi agatsinda 38.7% by'imipira atera.

Kuva yajya muri Amerika, kugeza mu minsi micye mbere ya NBA Draft yabaye mu ijoro ryo ku wa kane, Kuminga yari atarabonana n'ababyeyi be n'abavandimwe b'i Goma, bageze muri Amerika baje kureba NBA Draft.

Gusa ntiyibagiwe iwabo kuko mu kwezi kwa gatanu ubwo ikirunga cya Nyiragongo cyarukaga kigasenyera benshi iwabo, Kuminga yakusanyije inkunga yageze ku bihumbi by'amadorari akoresheje GoFundMe yo kohereza gufasha abo mu mujyi we.

Emmanuel Mwango umucuruzi wahoze ari umukinnyi wa Basketball uba mu mujyi wa Goma azi Kuminga i Goma afite imyaka 12 na 13.

Yabwiye BBC ati: "Mu bana banganaga na we niwe wari ikirenga, yarabarushaga, haba mu gusimbuka cyangwa gutsinda ibitego, wabonaga ko azavamo ikintu. Kuba agiye muri Warriors njye ntibintunguye cyane ariko ateye ishema kuri Congo na hano iwacu i Goma".

Kuminga abaye umukinnyi wa gatandatu uvuka muri DR Congo winjiye muri NBA nyuma y'abandi nka Dikembe Mutumbo, Didier "D. J." Ilunga-Mbenga, Christian Eyenga, Bismack Biyombo na mubyara we Emmanuel Mudiay.

Jonathan yamaze kuba umukinnyi mushya wa Golden State Worriors

Kuminga ni umwe mubanyafurika bakina muri NBA batanga icyizere






TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND