Leta ya Somalia yamaganye igitero cyakozwe n’inyeshamba za Al-Shabaab mu gace ka Kismayo, cyahitanye abakinnyi Bane (4) b’ikipe ya Jubaland Chamber of Commerce and Industry (JCCI), benshi barakomereka abandi baburirwa irengero.
Kuri
uyu wa Gatanu tariki ya 30 Nyakanga 2021, mu mujyi wa Kismayo muri leta ya
Jubaland iri mu Majyepfo ya Somalia, habereye igitero cyagabwe ku ikipe ya JCCI
gikozwe na Al-Shabaab, gihitana ubuzima bwa benshi ndetse bituma aka gace
kongera kugaragaramo imiborogo n’icuraburindi ryatewe n’izi nyeshyamba zayogoje
abaturage ba Somalia.
Iyi kipe ikina mu cyiciro cya mbere muri shampiyona ya Somalia yarashwe igiye mu mwiherero witegura shampiyona muri Leta ya Jubaland. Ibinyamakuru bitandukanye byo muri Somalia byatangaje ko iyi modoka yarimo abagera kuri 20.
Umuyobozi wa Polisi muri ako gace, Capt Ahmed Farah, yabwiye Ibiro Ntaramakuru by’Abongereza, Reuters, ko abitabye Imana ari batanu mu gihe abandi 12 bakomeretse. Yagize ati “Kugeza ubu abamaze gupfa ni batanu ndetse n’abakomeretse barenga 12. Gusa, hari abakinnyi tukibura”.
Mu gitondo cyo kuri uyu wa Gatandatu, ikinyamakuru Hiiraan cyo muri Somalia cyanditse ko abapfuye ari bane ndetse abakomeretse bajyanywe ku bitaro bya Kismayo. Perezida wa Somalia, Mohamed Abdullahi Mohamed, yihanganishije imiryango y’abakinnyi bitabye Imana, yamagana abagizi ba nabi bihishe inyuma y’iki gikorwa.
Itangazo ryavuye mu biro bye, ryanyujijwe kuri televiziyo ya Somalia, rigira riti “Perezida wa Somalia yihanganishije imiryango y’abakinnyi bakiri bato bishwe n’ibyihebe bya Al-Shabaab muri Kismayo”. Iki gitero cyabereye mu bilometero 500 uvuye mu murwa mukuru wa Mogadishu.
Igikorwa nk'iki cy'ubwiyahuzi ku ikipe y'umupira w'amaguru cyaherukaga mu myaka 11 ishize ubwo imodoka yari itwaye abakinnyi b'ikipe y'igihugu ya Togo yari yitabiriye imikino y'igikombe cya Afurika 'CAN' muri Angola, yarasiwe mu gace ka Kabinda n'inyeshyamba zikicamo bamwe mu bari bayirimo.
Imodoka yari itwaye abakinnyi ba FC JCCI yatewe n'inyeshyamba za Al-Shabaab zicamo bane, benshi barakomereka abandi baburirwa irengero
Amarira n'agahinda ku miryango y'abakinnyi ba FC JCCI
TANGA IGITECYEREZO