Kigali

Abantu 11 bishwe na Koronavirusi, 965 biganjemo ab'i Muhanga barayandura, Gatsibo na Bugesera ntihaboneka abarwayi!

Yanditswe na: Mupende Gedeon Ndayishimiye
Taliki:30/07/2021 0:44
0

Abantu bagera kuri 965 ni bo basanzwemo icyorezo cya Covid-19 mu gihugu hose kuri uyu wa 29 Nyakanga 2021. Ni mu gihe igikorwa cyo guha abaturarwanda urukingo rw'iki cyorezo gikomeje aho kuri uyu wa Kane hakingiwe abantu 8,627.



Raporo ya Minisiteri y'Ubuzima (MINISANTE) yo kuri uyu wa Kane, igaragaza ko abantu 11 (abagore 2 n'abagabo 9) bahitanywe na Covid-19 mu masaha 24 ashize. Mu bipimo 9,875 byafashwe, abantu basanzwemo iki cyorezo ni 965. Abarwayi bakiriwe mu bitaro ni 33 naho abasezerewe ni 23. Abarembeye mu bitaro ni 61.

Kuva Covid-19 yagera mu Rwanda mu ntangiriro za 2020, kugeza uyu munsi imaze guhitana abantu 787 hirya no hino mu gihugu. Muri aba harimo 11 bitabye Imana mu masaha 24 ashize, abo akaba ari abo mu turere twa Muhanga (3), Musanze (2), Kigali, Ngororero, Gicumbi, Kirehe, Rwamagana na Rubavu. Abaturarwanda bakingiwe Covid-19 kuri uyu wa Kane bagaterwa Doze ya mbere ni 8,627, naho abamaze gukingirwa byuzuye ni 448,195.

Raporo ya MINISANTE igaragaza ko Umujyi wa Kigali ari wo wabonetsemo ubwandu bwinshi bwa Covid-19 bugera ku 108, gusa umuntu yavuga ko Muhanga ari ko Karere kabonetsemo abarwayi benshi bagera ku 105 kuko Kigali ibarirwamo Uturere dutatu: Nyarugenge, Kicukiro na Gasabo. Utundi turere twugarijwe cyane n'iki cyorezo ni Huye, Gicumbi, Kayonza na Musanze. Uturere tutabonetsemo umurwayi n'umwe wa Covid-19 ni tubiri, akaba ari Gatsibo na Bugesera.

Ubwandu bwa Covid-19 buri kwiyogera cyane cyane mu Turere two mu Ntara mu gihe Kigali, Uturere 8 n'Imirenge 50 biri muri Guma mu rugo iteganyijwe kurangira tariki 31 Nyakanga 2021 ku ruhande rwa Kigali n'uturere 8. Kuko Imirenge 50 iherutse gushyirwa nayo muri Guma mu rugo, yo biteganyijwe ko izava muri iyi gahunda tariki 10 Kanama 2021. Gusa ibi byose bizaterwa n'isesengura rya MINISANTE, ibisobanuye ko Guma mu rugo ishobora kurangira cyangwa ikongezwaho indi minsi. 

Ikigo cy'Igihugu gishinzwe Ubuzima, RBC, kirasaba abaturarwanda kudatinda kugana ibitaro n'Ibigo nderabuzima mu gihe ugaragaje ibimenyetso bya Covid-19 na cyane ko "Ibigo nderabuzima bisaga 500 mu Rwanda bifite ubushobozi n'ibikoresho byo gupima Covid-19" Bongeyeho bati "Ugaragaje ibimenyetsi si ngombwa ko abitindana". Mu kwirinda iki cyorezo, abaturarwanda basarabwa gukomeza kubahiriza amabwiriza ya Minisiteri y'Ubuzima.


Abantu 11 bahitanywe na Covid-19 kuri uyu wa Kane


Kigali yose yabonetsemo abarwayi 108 naho Muhanga yonyine ibonekamo 105






TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND