Minisiteri y'Ubuzima mu Rwanda (MINISANTE) yatangaje ko kuri uyu wa Gatatu tariki 28 Nyakanga 2021 abantu 5 (abagore 2 n'abagabo 3) bishwe n'icyorezo cya Covid-19, abagera kuri 915 barayandura naho abagera kuri 7,565 bahabwa Doze ya mbere y'urukingo rw'iki cyorezo.
MINISANTE yanditse kuri Twitter iti "Twihanganishije imiryango y'abagore 2 n'abagabo 3 bitabye Imana". Raporo y'iyi Minisiteri igaragaza ko mu masaha 24 ashize hafashwe ibipimo 9,628 mu gihugu hose, mu minsi 7 hakaba harafashwe ibipimo 129,807. Ibipimo bimaze gufatwa kuva Covid-19 yagera mu Rwanda birarenga Miliyoni ebyiri (2,046,754).
Kuri uyu wa Gatatu kandi, abantu bagera kuri 915 basanzwemo Covid-19 mu gihugu hose, aba akaba ari 9.5% y'ibipimo byafashwe, ibisobanuye ko mu bantu 100 bapimwe Covid-19, muri bo abagera ku 9 basanzwemo iki cyorezo. Abantu 5 nibo bishwe na Covid-19 mu masaha 24 ashize, abahitanywe nayo mu minsi 7 ni abantu 84, abamaze guhitanwa n'iki cyorezo kuva cyagera mu Rwanda kugeza uyu munsi ni 776.
Iyi Raporo ya Minisiteri y'Ubuzima igaragaza kandi ko kuri uyu wa Gatatu abantu 37 ari bo bakiriwe mu bitaro barwaye Covid-19, abasezerewe akaba ari 22. Abarembeye mu bitaro kubera iyi ndwara ni 61. Abahawe Doze ya mbere y'urukingo rwa Covid-19 ni 7,565 naho abaturarwanda bamaze gukigirwa byuzuye ni 439,568.
Abantu 5 bishwe na Covid-19 kuri uyu wa Gatatu
Eng
RSS 
TANGA IGITECYEREZO