Tanzania yabaye ikipe ya mbere igeze ku mukino wa nyuma wa CECAFA U 23

Mu mukino wa mbere wa 1/2 Tanzania itsinze bigoranye ikipe ya Sudani y'Epfo igitego kimwe ku busa. Sudani y'Epfo mu kibuga yari yarushije Tanzania ariko birangira aka bukuru kayikozeho.

Igice cya mbere cyarangiye ari 0-0 ariko ba rutahizamu ba Sudani y'Epfo barimo Dani Lual Gumanok na Emmanuel William bari bagoye ba myugariro ba Tanzania. Mu gice cya 2 Tanzania yabonye kufura yabyaye igitego ku munota 64 umupira watewe na Nafter Kelvin Nashon ba myugariro ba Sudini y'Epfo bawukoraho baritsinda umukino unarangira ari igitego kimwe cya Tanzania ku busa bwa  Sudani y'Epfo.

Nyuma y'umukino umutoza wa Tanzania Kim Poulsen yatangaje ko yishimiye Intsinzi yabonye. Yagize ati" ndishimye kuba tugeze ku mukino wa nyuma, gusa Sudani y'Epfo yaduhaye akazi gakomeye cyane ariko nta kundi Niko iyi mikino imera." U Burundi burakina na Kenya mu mukino wa 2 naho hagomba kuboneka ikipe isanga Tanzania Ku mukino wa nyuma.