Ahabanza Imikino

Europa Conference League: Manzi Thierry yakinnye umukino we wa mbere, Nirisarike avamo, Rwatubyaye arakomeza

Yanditswe na: ISHIMWE Olivier Ba
Taliki:16/07/2021 7:58 0

Kuri uyu mugoroba ni bwo irushanwa rya Europa Conference League ryakomeza hakinwa imikino yo kwishyura mu ijonjora rya mbere, aho Manzi Thierry nyuma yo kugera mu ikipe yinjiye mu kibuga asimbuye.

Europa Conference League ni irushanwa riri gukinwa ku nshuro yaryo ya mbere riba irushanwa riri ku kigero cya Gatatu i Burayi inyuma ya Champions League na Europa league. Kuri uyu mugoroba rero amakipe 3 arimo abakinnyi b'abanyarwanda yamanukaga mu kibuga ariko abiri muri yo ntabwo yahiriwe kuko yahise asezererwa.

Manzi Thierry wambaye 23 agana ku mwanya we.

Ikipe ya FC Dila Gori Manzi Thierry akinira yasezerewe nyuma yo gutsinda ibitego 2 kuri kimwe ariko umukino ubanza bakaba bari batsinzwe ibitego 5-1 Manzi Thierry yinjiye mu kibuga asimbuye David Maisashvili ku munota wa 77. Wari umukino wa mbere Manzi Thierry akinnye kuva yagera muri iyi kipe mu cyumweru gishize.

Indi kipe yasezerewe ni FC Urartu ikinamo myugariro Nirisarike Salomon. Urartu yatsinzwe igitego kimwe ku busa kandi nabwo umukino ubanza yari yatsinzwe igitego kimwe ku busa iba isezerewe ku bitego 2-0 Nirisarike Salomon yabanje mu kibuga ndetse umukino arawusoza.

KF Shkupi ikinamo myugariro Rwatubyaye Abdul niyo kipe yabashije gukomeza mu kindi cyiciro nyuma yo kunganya igitego 1-1 ariko mu mukino ubanza ikaba yari yatsinze ibitego 2 ku busa harimo n'igitego cya Rwatubyaye.