Inama y'Abaminisitiri: Isaha yo kugera mu rugo yabaye 'Saa Tatu', Dr. Diane Gashumba na Prof. Shyaka bagirwa ba Ambasaderi

Inama y'Abaminisitiri yateranye nyuma y'amasaha macye Perezida Paul Kagame aciye amarenga ko hari ibikorwa bimwe na bimwe bishobora gufungwa mu kwirinda icyorezo cya Covid-19 cyagarukanye imbaraga mu Rwanda n'ahandi henshi ku Isi. Benshi bari bafite ubwoba ko hashyirwaho 'Guma mu rugo', ariko Inama y'Abamanisitiri yasanze Guma mu rugo atari wo mwanzuro ukenewe ubu, gusa bakaba bashyizeho izindi ngamba zikomeye zirimo no kuba isaha yo kugera mu rugo yagizwe saa Tatu, imodoka zitwara abagenzi mu modoka rusange zisabwa gutwara 50%.

Ku bijyanye n'ubukwe, Inama y'Abaminisitiri yemeje ko "ishyingirwa rikorewe imbere y'ubuyobozi bwa Leta no mu nsengerp ryemewe kwitabirwa n'abantu batarenze 30 kandi bikabanza kumenyeshwa Ubuyobozi bw'inzego z'ibanze". Ubusabane n'ibirori bitandukanye bibera mu ngo birabujijwe. Resitora na Cafe zizakomeza gukora ariko ntizirenze 30% y'ubushobozi bwazo bwo kwakira abantu, zemerewe kwakira abantu kugeza saa mbiri z'ijoro. Abaturarwanda basabwe gukomeza kubahiriza amabwiriza yo kwirinda Covid-19 arimo; gusiga intera hagati y'umuntu n'undi, kwambara agapfukamunwa no gukaraba intoki.

Inama y'Abaminisitiri yashyize mu myanya abayobozi barimo Prof. Shyaka Anastase wahoze ari Minisitiri w'Ubutegetsi bw'Igihugu akaza gusimbuzwa Gatabazi Jean Marie Vianney, akaba yahawe imirimo mishya agirwa Ambasaderi w'u Rwanda muri Repubulika ya Polonye, Dr. Diane Gashumba wahoze ari Minisitiri w'Ubuzima agasimburwa na Dr. Ngamije Daniel, we yagizwe Ambasaderi w'u Rwanda mu Bwami bwa Suwede. Bwana James Gatera, yagizwe Ambasaderi w'u Rwanda muri Israel naho Bwana Michel Sebera agirwa Ambasaderi w'u Rwanda mu Bwami bw'u Buholandi.

Ibyemezo by'Inama y'Abaminisitiri yo kuri uyu wa Gatandatu