Simba ishobora kongerera amasezerano Kagere Meddie ibabaye kubera mucyeba

Hasigaye igihe kitagera ku Cyumweru ngo amasezerano ya Kagere Meddie agere ku iherezo, tugendeye ku gihe yasinyiye n'ubwo umwaka w'imikino uzaba ugikomeza. Tariki 17 Kamena 2019, ni bwo Simba yongereye amasezerano y'imyaka 2 uyu musore w'umunyarwanda. Kagere Meddie yageze muri Simba mu mwaka w'imikino 2018-2019 asinya umwaka umwe ubwo yari avuye muri Gormahia.

Ibinyamakuru byo muri Tanzania biri gutangaza ko Kagere n'ubwo ari mu bihe bibi mu kibuga kubera ko ari gukoreshwa nk'umusimbura ariko ashobora guhabwa amasezerano mashya kubera Yanga African.

Kagere Meddie ni umukinnyi w'Amavubi 

Simba iri mu gihirahiro kubera ko yateganyaga kurekuza Kagere Meddie ariko ikaba ifite ubwoba ko yahita yerekeza muri Yanga African. Simba na Yanga African zikunze guhangana cyane ndetse no kugurana abakinnyi ntibikunze kubaho ariyo mpamvu buri kipe yakora igishoboka cyose ngo umukinnyi wayo atajya muri mucyeba. Simba niyo iheruka gutera icy'umutwe ubwo yatwaraga Benard Morrison avuye muri Yanga African, ari nabyo bitera ubwoba Simba kuba yarekuza Kagere Yanga igahita imutwara.

Mu myaka 3 Kagere amaze muri Simba yabaye umukinnyi watsinze ibitego byinshi inshuro 2 ndetse n'ubu ari muri 4 ba mbere, ariko umutoza wasimba akaba yarahisemo kujya abanza mu kibuga Cris Mugaru nka rutahizamu mukuru.

Kagere Meddie ni umugabo w’imyaka 35 yashakanye n’Umunyarwandakazi. Uyu rutahizamu yavukiye muri Uganda ku wa 10 Ukwakira 1986. Yakiniye ikipe ya Mbale Heroes FC hagati ya 2004-2006. 

Yahavuye ahita aza mu Rwanda mu Ikipe ya Atraco FC mu 2006. Nyuma y’umwaka umwe yagiye muri Kiyovu Sports yavuyemo yerekeza muri Mukura Victory Sports mu mwaka w’imikino 2008-2009 kugeza mu 2010 ubwo yajyaga muri Police FC, aho yakinnye imikino 40 agatsinda ibitego 38.

Mu 2012 yerekeje muri ES Zaris yo muri Tunisia atamazemo igihe, ahita agaruka muri Police FC. Nyuma yaho yakinnye muri Rayon Sports, aho mu mikino 12 ya shampiyona yo kwishyura, yatsindiye iyi kipe yambara ubururu n’umweru ibitego umunani.

Mu 2014 yerekeje muri Albania mu ikipe ya KF Tirana, batandukanye tariki ya 1 Mutarama 2015, basheshe amasezerano. Mu mwaka wa 2015, nibwo Kagere Meddie yatangiye gukinira Gor Mahia afite amasezerano y’umwaka umwe, aho yayitsindiye ibitego 31 mu mikino yose yakinnye, ariko bananirwa kumvikana ku masezerano mashya, batandukana muri Mutarama.