Umunya-Mexico Fernanda yegukanye ikamba rya Miss Elite World, Judith Heard yegukana irya Miss Elite Africa

Ni mu birori byabaye hubarizwa ingamba zo kwirinda Covid-19 mu ijoro ry’uyu wa Gatandatu tariki 29 Gicurasi 2021, bibera ahitwa Fairmont Nile City mu Mujyi wa Cairo mu Misiri.

Iri rushanwa ryari rihatanyemo abakobwa barenga 28 hari ukomoka muri Morocco, Kenya, Belgium, Canada, Cyprus, Sweden, Finland, Greece, India, Colombia, Lebanon n’abandi.

Miss Elite World yitabiriwe n’abanyamideli, abahanzi, abakinnyi ba filime, abitabiriye Miss Universe, abavuga rikijyana ku mbuga nkoranyambaga n’abandi.

Fernanda Pumar usanzwe ari umukinnyi wa filime n’umunyamideli niwe wegukanye ikamba rya Miss Elite World ahigitse bagenzi be, agaragirwa n’ibisonga bibiri. Ni mu gihe Umunyamideli Judith Heard uba muri Uganda yegukanye ikamba rya Miss Elite Africa 2021-2022.

Yanditse kuri konti ye ya Instagram ashyiraho amafoto n’amashusho, ashima buri wese wabanye nawe muri uru rugendo. Ati “Mwakoze cyane Uganda n’abandi bose bari ahantu hatandukanye ku Isi. Munyemerere mbibwire ku yindi nshuro. Ndi Miss Elita Africa 2021-2022.”

Judith Heard yavuze ko ikamba yegukanye ari iry’abana be n’Igihugu cye. Abantu batandukanye umuhanzikazi Iryn Namubiru, Social Mula, Miss Olivier Nakakande bamwifurije ishya n’ihirwe.

Muri Nzeri 2020, ikinyamakuru cy’iri rushanwa cyitwa Miss Elite, cyanditse ko ari amateka adasanzwe mu marushanwa y’ubwiza ku Isi, kuko bishoboka ko ari bwo bwa mbere umukobwa urengeje imyaka 28 y’amavuko yitabiriye irushanwa ahatanye n’abakobwa bo mu myaka 20.

Iki kinyamakucu cyavuze ibi kubera ko Judith Heard agejeje imyaka 34 y’amavuko, ni mu gihe abo bari bahatanye bari munsi y’imyaka 30 y’amavuko.

Erin Chapman wari uhagarariye Canada niwe wegukanye ikamba rya Miss Elite Amerika 2021. Yanditse kuri konti ye ya Instagram, avuga ko ari kumwe na Fer Pumarg wegukanye ikamba rya Miss Elite World mu modoka imwe berekeza aho irushanwa ryabereye, yari yamubwiye ko ari byo amwifuriza hanyuma we akegukana ikamba rya Miss Elite America, ‘kandi koko niko byagenze’.

Uyu mukobwa yavuze ko atewe ishema no kuba yabonetse mu 10 bavuyemo Nyampinga akanegukana ikamba rya Miss Elite America.

Fernanda Puma ukurikirwa n’abarenga ibihumbi 17 wegukanye ikamba rya Miss Elite World 2021, yanditse kuri konti ye ya Instagram, avuga ko yishimiye kwegukana iri kamba, ashima abakobwa bari bahatanye n’abateguye iri rushanwa.

Muri iri rushanwa kandi hatanzwe amakamba arimo nk’irya Miss Elite 1ST RU, Miss Elite 2ND RU, Miss Elite Asia, Miss Elite Europe, Miss Popularity, Miss Congeniality, Miss Photogenic n’andi.

Iri rushanwa rigeze hagati, abaritegura bavuze ko amakuru ababaje ari uko ritabereye aho ryagombaga kubera no guca kuri Televiziyo ‘bitewe n’ingamba Guverinoma ya Misiri yafashe mu guhangana na Covid-19’.

Abakobwa biyerekanye mu myambaro gakondo iranga buri gihugu buri wese akomokamo. Mbere y’uko amasaha agera buri wese yitaweho uko bishoboka mu bijyanye n’uko agaragara imbere y’abantu, ndetse bamwe mu bakobwa bakomezaga kwandika basaba abantu gukomeza kubatora.

Ni igikorwa cyitabiriwe n’abanyamakuru b’ibitangazamakuru bitandukanye bari bambaye udupfukamunwa mu rwego rwo kwirinda Covid-19. Buri mukobwa kandi yanyuraga ahari icyapa kinini kiranga iri rushanwa hari na tapi itukura agafotorwa, ari nako akomereza mu kiganiro n’itangazamakuru. Birangiye, abakobwa bose bahuriye mu ifoto imwe.

 

Erin Chapman wegukanye ikamba rya Miss Elite Amerika 2021, yavuze ko yari yabwiye Fernanda ko ariwe uza kwegukana ikamba risumba ayandi Judith Heard wo muri Uganda ukurikirwa n’abarenga ibihumbi 360 kuri Instagram yegukanye ikamba rya Miss Elite Africa