Massimiliano Allegri watoje Juventus ashobora kuba umusimbura wa Artera muri Arsenal

Arsenal yaraye isezerewe muri 1/2 cya UEFA Europa League na Unai Emery wanyuze muri iyi kipe byatumye ubuyobozi bw'iyi kipe bwongera gutekereza ku kazoza k'uyu mutoza Mikel Arteta. Tariki 20 Ukuboza 2019 ni bwo Arteta yagizwe umutoza mukuru wa Arsenal ndetse afite amasezerano agera mu 2023. Arsenal yimitse uyu mugabo ifite gahunda yo kubaka ikipe igendeye mu nzira ndetse n'imico y'ikipe.

Kugeza ubu Massimiliano nta kazi afite 

Arsenal yatandukanye na Unai Emery wari warayigejeje ku mukino wa nyuma wa Europa League ariko Arteta ntabwo abashije no kugezayo iyi kipe akomwe mu nkokora na Unai Emery.

Ubuyobozi bwa Arsenal, ntabwo bunyuzwe n'umusaruro w'uwahoze ari Kapiteni wayo, kuko ubu iyi kipe yambara umweru n'umutuku irambaraye ku mwanya wa 9 ku rutonde rwa shampiyona. Arsenal irangirije ku mwanya wa 9 byaba bibaye ubwa mbere iyi kipe ibuze tike yo kwitabira Champions League ndetse na Europa League icyarimwe.

Umusimbura wa Arteta afite ibigwi bikomeye cyane mu Butaliyani 

Ibinyamakuru bitandukanye bikomeje kwemeza ko uwahoze ari umutoza wa Juventus Massimiliano Allegri ubu ariwe witezwe kuba yaba umusimbura wa Artera naramuka atewe ipine. Massimiliano Allegri ni Umutaliyani w'imyaka 53 akaba yarubatse izina mu mwuga w'ubutoza mu gihugu cye cy'amavuko aho yatoje ikipe ya AC Milan kuva 2010-2014 ndetse ahava ajya muri Juventus nayo yavuyemo mu 2019.