Perezida Putin yagereranyije urukingo rwa Covid-19 u Burusiya bwakoze n’imbunda ya Kalashnikov (AK-47) yabaye rurangiranwa

Perezida Putin yabitangaje mu ijoro ry’uyu wa Kane tariki 06 Mata 2021, mu kiganiro cyabaye hifashishijwe iyakure yahuriyemo na Minisitiri w’Intebe wungirije Taytana Golikova.

Ati “Ndasaba abantu batuye Isi kumva ko urukingo rwacu rwa Sputnik V ari urwo kwizerwa ku kigero bakwiye no kurenza ku ijanisha rirenze ijana ku ijana. Barwizere ku kigero kimwe n’imbunda ya Kalashnikov

Minisitiri w’Intebe wungirije Taytana Golikova yunze mu rya Perezida Putin avuga ko uko Kalashnikov yakorewe mu Burusiya ntitenguhe abayikoresheje mu ntambara, bamwe ikanabageza ku bwigenge ari nako “urukingo rwacu rumeze.” Ashimangira ko uru rukingo rwakoranywe ubuhanga

Ejo ku wa Kane, U Burusiye bwemeje ubundi bwoko bushya bw’urukingo rwa Sputnik V rutangwa nka doze imwe gusa, rukaba rwahawe izina rya Sptunik Light.

Uru rukingo rumaze kwemeza mu bihugu bitandukanye byo ku Isi. Ndetse rukora kimwe n’inkingo zakozwe na kompanyi na Johnson&Johnson, AstraZeneca, Pfizer-BionNTech n’izindi.

Urukingo rw’u Burusiya rwabanje gushidikanwaho, ariko igenzura ryakozwe ryagaragaje ko rukora ku kigero kinini cyane. U Burusiya buvuga ko doze imwe ya Sputnik Light ikingira umuntu ku kigero cya 79.4%.

Abantu barenga Miliyoni 21 mu Burusiya bamaze gukingirwa Covid-19, abarenga miliyoni 8 nibo bamaze guhabwa doze ya kabiri y’urukingo. Ku Isi yose abarenga miliyari 1 bamaze gukingirwa, muri bo miliyoni 298 nibo bamaze guhabwa doze ya kabiri.

Umujenerali w’Umusoviete Mikhail Kalashnikov niwe wakoze imbunda Kalashnikov yamwitiriwe, yamamaye cyane ku izina rya AK-47. Uyu mugabo yitabye Imana tariki 23 Ukuboza 2013, afite imyaka 94 y’amavuko.

Uyu mugabo yatanze umushinga w’imbunda ye mu marushanwa yari agamije gushishikariza abantu gukora imbunda kabuhariwe izifashishwa mu gutsinda urugamba rw’intambara ya kabiri y’Isi yose.

AK-47 ni nyambere mu mbunda zakoreshejwe cyane mu ntambara zose zo ku Isi mu kinyejana cya 20. Iyi mbunda yaramamajwe cyane, ndetse benshi bayisubiramo.

Abayikoresheje bayishima ko idahenze, byoroshye kuyitaho no kuyikoresha. Ni imbunda yitwazwa n’abashumba hirya no hino ku Isi no mu Butayu bw’Afurika kugera ku ba Jenerali bayoboye ingabo mu ntambara.

Iyi mbunda yakoreshejwe n’abarimo Osama Bin Laden washinze umutwe w’iterabwoba wa Al Qaeda, igereranywa n’imbunda ya M16 y’Abanyamerika.