Kigali
-->

Europa League: Ninde uhanganiye igikombe na Manchester United ifatwa nk’igifi kinini mu nyanja?

Yanditswe na: SAFARI Garcon
Taliki:30/04/2021 10:16
0

Nyuma y’imikino ibanza ya ½ muri Europa League yagaragaje imbaraga n’ubushobozi bwa buri kipe ihataniye igikombe cy’uyu mwaka, impaka zikomeje kuba ndende mu bakunzi ba ruhago hibazwa ninde ufite ubushobozi bwo guhangara Manchester United hagati ya Villarreal na Arsenal?



Mu ijoro ryo kuri uyu wa Kane tariki ya 29 Mata 2021, hakinwe imikino ibanza ya ½ muri Europa League. Kuri Estadio de la Cerámica muri Espagne, ikipe ya Villarreal yari yakiriye Arsenal, iyitsinda ibitego 2-1, mu mukino watanzwemo amakarita abiri y’umutuku.

Nyuma y’iminota itanu gusa umukino utangiye, ku mupira waturutse k’umunya-Nigeria Samuel Chukwueze, Manuel Trigueros yafunguye amazamu atsinda igitego cya mbere cya Villarreal, ku munota wa 29 ku mupira wa Gerard Moreno, Raul Albiol yatsinze igitego cya kabiri bituma Villarreal isoza iminota 45 iyoboye umukino.

Arsenal yatangiranye ibibazo mu gice cya kabiri kuko ku munota wa 57, Daniel Ceballos yabonye ikarita ya kabiri y’umuhondo ivamo ikarita itukura ahita asohorwa mu kibuga.

Ku munota wa 73 kuri penaliti, Nicolas Pepe yatsinze igitego cya mbere cya Arsenal. Ku munota wa 80 Etienne Capoue wa Villarreal yabonye ikarita ya kabiri y’umuhondo yamuviriyemo ikarita itukura, iminota 90 y’umukino irangira Villarreal yegukanye amanota atatu ku ntsinzi y’ibitego 2-1.

Imibare irivugira kandi irashoboka ku mpande zombi mun mukino wo kwishyura, Arsenal irasabwa gutsinda igitego 1-0 ikabona itike y’umukino wa nyuma. Ku rundi ruhande ibirori bikomeye byari mu Bwongereza ku kibuga Old Trafford aho Manchester United yandagaje AS Roma ikayitsinda ibitego 6-2.

Manchester United yari mu rugo, yafunguye amazamu ku munota wa 9 ku gitego cyatsinzwe na Bruno Fernandes ariko ntibyatinze kuko AS Roma yahise icyishyura ku munota wa 15 ibifashijwemo na Pellegrini kuri Penaliti yabonetse nyuma yuko Pogba agaruye umupira n’ukuboko.

AS Roma yatsinze igitego cya kabiri ku munota wa 34 gitsinzwe na Edin Dzeko, bituma iyi kipe yo mu Butaliyani isoza igice cya mbere ku 2-1 nubwo yari yavunikije abakinnyi 3 barimo n’umunyezamu wayo Pau Lopez.

United yagarukanye imbaraga nyinshi cyane mu gice cya kabiri, kuko ku munota wa 48 Edinson Cavani yatsinze igitego cya kabiri, amakipe yombi anganya 2-2.

Ibitego byahise byisukiranya nk’imvura ku ruhande rwa United kuko ku munota wa 64 uyu Cavani yashyizemo igitego cya 3, ku munota wa 71 kuri penaliti Bruno Fernandes yatsinze igitego cya kane ku ikosa ryakorewe Cavani, ku munota wa 75 Paul Pogba yatsinze igitego cya 5 n’umutwe hanyuma Mason Greenwood ashyiramo agashinguracumu ku munota wa 86, iminota 90 y’umukino irangira United itsinze AS Roma ibitego 6-2.

Muri uyu mukino Edinson Cavani yatsinze ibitego 2, atanga imipira 2 yavuyemo ibitego, anakorerwaho penaliti.

Manchester bisa n’aho yasezereye Roma hakiri kare mbere y’umukino wo kwishyura, kubera ko kugira ngo Roma ikuremo United isabwa gutsinda ibitego biri hejuru ya 4-0 mu mukino uzabera mu Butaliyani.

Nyuma yo gutsinda Roma 6-2 mu mukino ubanza, bikayiha amahirwe 80% yo kugera ku mukino wa nyuma, benshi mu bakunzi ba ruhago bakomeje kwibaza ikipe yayihangara ku mukino wa nyuma ikayitwara igikombe hagati ya Arsenal na Villarreal.

United ifatwa nk’igifi kinini mu Nyanja, irahabwa amahirwe menshi yo kwegukana igikombe cy’uyu mwaka kuko igaragaza imbaraga n’ubushobozi bwo kwegukana iri rushanwa.

Bruno Fernandez ukomeje kwigaragaza cyane muri iyi kipe arahabwa amahirwe yo kuzaba umukinnyi mwiza w’iri rushanwa.

Manchester United yanyagiye AS Roma 6-2 itera intambwe ikomeye iyerekeza ku mukino wa nyuma

Cavani yafashije cyane Manchester United muri uyu mukino


Manchester United irahabwa amahirwe menshi yo kwegukana iki gikombe

Arsenal ntiyorohewe na Villarreal muri Espagne

Villarreal ya Unai Emery yatsinze Arsenal 2-1






TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND