Biravugwa: Undi mukinnyi wa APR FC agiye kwerekeza i Burayi atanzweho akayabo

Biravugwa ko APR FC igeze kure mu biganiro na Jagiellonia Białystok yagaragaje ko yifuza uyu mukinnyi ndetse ikaba yiteguye kumutangaho ibihumbi 200€ (miliyoni 200 Frws). Icyakora APR FC yo ntacyo iratangaza kuri aya makuru.

Nsanzimfura Keddy w’imyaka 18 yageze muri APR FC muri Nyakanga 2020, avuye muri Kiyovu Sports. Mu mwaka umwe ayimazemo, Keddy amaze gutsinda igitego kimwe yatsinze Gor Mahia yo muri Kenya mu irushanwa rya CAF Champion League.

N'ubwo atarahamagarwa mu ikipe y’igihugu nkuru, Keddy yabaye kapiteni w’ikipe y’igihugu y’abatarengeje imyaka 17 yitabiriye imikino yo gushaka Igikombe cya Afurika yabereye muri Tanzania mu 2018.

Keddy abaye umukinnyi wa kabiri wa APR FC uvuzwe mu makipey’I Burayi mu gihe kitarenze ukwezi kumwe, nyuma ya Byiringiro Lague we wamaze guhabwa ubutumire bwo kujya mu igeragezwa muri FC Zurich yo mu Busuwisi.

Mupenzi Eto’o ushinzwe igura n’igurisha ry’abakinnyi muri APR FC, biravugwa ko ariwe uri kurambagiriza abakinnyi b’iyi kipe amakipen y’i Burayi.

Jagiellonia Białystok Sportowa Spółka Akcyjna izwi nka Jaga yifuza Nsanzimfura Keddy, imaze imyaka 100 ishinzwe, ikaba ikina mu cyiciro cya mbere, ikaba yakirira imikino yayo ku kibuga cya Stadion Miejski cyakira abantu 22,372.

Iyi kipe yasoje ku mwanya wa munani mu mwaka ushize w’imikino, itozwa n’umwenegihugu Bogdan Zając.

Jaga iheruka kwegukana igikombe cya shampiyona mu mwaka w’imikino wa 2009-2010, ndetse ikaba yaranegukanye igikombe cya Polish Supercup mu 2010.

Magingo aya ikipe ya  Jagiellonia iri ku mwanya wa 12 mu makipe 16 muri shampiyona y’uyu mwaka n’amanota 28 mu mikino 22, ikaba irushwa na Legia Warsaw ya mbere amanota 20.

Nsanzimfura Keddy ashobora kwerekeza muri Pologne

Keddy ni umwe mu bakinnyi b'ejo hazaza APR FC ICUNGIYEHO