Tanzania: Abapadiri 25 n’ababikira 60 bahitanywe na Coronavirus mu mezi abiri ashize

Ibinyamakuru bitandukanye birimo ibyo muri Tanzania na hanze yayo byanditse iyi nkuru aho byose bihuriza ku rupfu rw’abo bihaye Imana. Umuyobozi w’ihuriro ry’abepisikopi bo muri Tanzania (Tanzania Episcopal Conference) TEC, Padiri Charles Kitima ku wa Gatatu tariki 3/3/2021 yasobanuye ko abapadiri barenga 25 n’ababikira (nuns) 60, abakuze babiri b’abalayiki bapfuye mu mezi abiri ashize bishwe na Coronavirus. 

Uyu mupadiri yabwiye itangazamakuru ko Coronavirus ikwiriye guhashywa mu nzira zose zishoboka ndetse yasabye insengero kwitwararika hagakurikizwa amabwiriza yo kwirinda. Ati: "Ndabinginze muruheho kwirinda mukurikiza amabwiriza muhabwa na minisiteri y’ubuzima, abapadiri bari gupfa, ababikira bari gupfa kandi uyu mubare wabonetse mu mezi abiri waduteye ubwoba’’. 

Mu minsi ishize Perezida Magufli yabwiye abaturage ko coronavirus ikizwa n’amasengesho. Icyakora yaje kwisubiraho ku ya 21 Gashyantare 2021 asaba abaturage gutangira kwirinda bakanambara agapfukamunwa gusa yabategetse kwambara udukorerwa imbere mu gihugu. 

Igiteye inkenke ni uko nta baturage bari gupimwa ndetse na Minisiteri y'ubuzima muri iki gihugu mu kwezi gushize yatangaje ko gahunda ihari yo guha abaturage urukingo rwa Coronavirus nk'uko byatangajwe na BBC.

Kiliziya gatorika ifite ibigo nderabuzima birenga 500 ariko byose ntibyemerewe gusuzuma coronavirus. Kuva mu kwezi kwa gatanu umwaka ushize Tanzania ntiratangaza imibare y’abanduye coronavirus. Mu kwezi gushize Minisiteri y'Ubuzima muri Tanzania yatangaje nta gahunda ifite yo gukingira.

Padiri Charles Kitima yavuze ko Kiliziya itemerewe gupima abaturage bayo mu mavuriro bafite arenga 500

Src: BBC & The East African