Yatobanye akondo n’abarimo Bob Marley na Peter Tosh! Ibigwi bya Bunny Wailer witabye Imana bitunguranye

Bunny Wailer ukomoka muri Jamaica, yari umunyamuryango washinze The Wailers ari kumwe n'inshuti ye yo mu bwana, Bob Marley aho baje gukora indirimbo za Reggae y’umwimerere zakunzwe cyane nka Simmer Down na Stir It Up mbere y'uko Wailer ava mu itsinda akajya gukora muzika ku giti cye  muri 1974.

Uyu muhanzi Wailer, yakomeje gutsindira ibihembo bya Grammy inshuro nyinshi aho yabyegukanye inshuro eshatu ahabwa Iteka ny’ikirangirire muri muzika ya Jamaica muri 2017.

Yatabarutse Tariki 2 Werurwe 2021. Urupfu rwe rwemejwe n'umujyanama we wanamurebereraga inyungu, Maxine Stowe, binashimangirwa na Minisitiri w’umuco wa Jamaica, Olivia Grange. Impamvu y'urupfu rwa Bunny Wailer ntiramenyekana, ariko mu mwaka wa 2020 yari mu bitaro afite indwara ya Stoke.

Minisitiri w’intebe wa Jamaica, Andrew Holness, na we yunamiye uyu munyabigwi avuga ko urupfu rwe ari igihombo gikomeye kuri Jamaica ndetse na reggae.

Amazina ye nyakuri yitwa Neville O'Riley Livingston, yari umunyamuryango wa nyuma mu itsinda The Wailers wari ukiri ku isi, nyuma y'urupfu rwa Bob Marley wazize kanseri mu 1981, ndetse n'iyicwa rya Peter Tosh mu gihe cy'ubujura mu 1987.

Bunny Wailer, yavutse ku ya 20 Mata 1947. Livingston (Bunny Wiler) yamaze imyaka ye yo mu bwana mu mudugudu wa Nine Miles, aho yakuriye na se Thaddeus. Aha niho yahuriye bwa mbere na Bob Marley, maze kuko bari abana bato barakurana bahita baba inshuti zihamye, bakorera umuziki wabo wa mbere muri Stepney Primary and Junior High School.

Ku myaka yose yamaze ku isi, afite umwana umwe witwa Sensi Love. Bunny kandi yamenyekanye mu ndirimbo zirimo: Dreamland, Cool runnings, Rise Shine, na Album nyinshi zirimo, Blackheart Man, Liberation n’izindi.