“Utwakorewe mu gihugu ni two twiza” Perezida Magufuli yagiriye inama abaturage yo kwambara udupfukamunwa n'ubwo atari itegeko

Nyuma y'uko kuwa 19 Gashyantare 2021 Magufuli asabye abaturage kongera gukora amasengesho y’iminsi itatu yo kwirukana covid-19, uyu mukuru w’igihugu yongeye kugaragara asaba abaturage kwambara udupfukamunwa nubwo we yemeza ko amasengesho ariyo ntwaro ikomeye yo gutsinda covid-19.

Ibi byo kwambara agapfukamunwa bwana John Magufuli yabivuze ubwo yari ari mu kiliziya kuri uyu wa 21 Gashyantare mu murwa mukuru w'ubucuruzi Dar es Salaam, aho yanakomoje ku bwoko bw’udupfukamunwa bagomba kwambara aho avuga ko udukorerwa mu gihugu ko ari two twiza kurusha utuva hanze.

Nyuma y’ibi byose byatumye benshi bumva ko uyu mukuru w’igihugu ashobora kuba yahinduye umuvuno ku bijyanye n'uko yafataga iki cyorezo dore ko ibijyanye n’imibare y’abandura ndetse n'abakira byari byarahagaze ndetse ibi byanakururiye Tanzania mu mbizi n’ishami ry’umuryango wabibumbye rishinzwe ubuzima (OMS).

              Umukuru w'iguhugu cya Tanzania 

Abwira abari baje gusenga, Magufuli yabasabye gukomeza gufata ingamba zo kwirinda ikwirakwira rya Covid-19 nk'uko ikinyamakuru cya BBC ducyesha iyi nkuru kibivuga binyuze ku munyamakuru wacyo wari uri muri uyu mujyi ubwo Perezida yari ari mu rusengero i Dar es Salaam abivuga.

Ku rundi ruhande bwana John Magufuli yashishikarije abaturage kwivura ndetse no guhashya iki cyorezo hakoreshejwe uburyo bwa gakondo ngo kwiyuka ibyatsi.

Hashize iminsi muri Tanzania havugwa impfu z'abantu barimo n'abari hafi ya Magufuli ubwe, gusa ntibyemejwe ku mugaragaro ko bishwe na Covid-19.

Mu kwezi gushize, kiliziya yavuze ko misa z'abapfuye ziyongereye muri icyo gihe, gusa ntiyavuze impamvu yabyo.

Ku ruhande rw’ishami ry'umuryango w'abibumbye rishinzwe ubuzima ku isi, OMS/WHO, ryasabye leta ya Tanzania gushishikariza abantu kwirinda Covid-19 no kwitegura kubakingira, gusa iyi nkuru irasa n'itaragize uyitaho bitewe n'uko bwana Magufuli yemera ko amasengesho azabafasha kwigobotora ingoyi y’icyo cyorezo.

Mu butumwa yatanze mu cyumweru gishize, umukuru wa OMS Dr Tedros Adhanom yagaragaje impungenge z'uko hari abatanzania bajya mu bihugu bituranyi n'ahandi bakabasangamo Covid-19.

Ku wa 21 Gashyantare ku wari umunsi wa nyuma w'amasengesho no kwiyiriza byasabwe na Perezida Magufuli ngo Imana ibakize Covid-19.

Hagati mu mwaka ushize, nabwo Magufuli yasabye iminsi itatu y'amasengesho mu gihugu, nyuma yayo gato avuga ko coronavirus yashize muri iki gihugu.

Src: bbc