Uwahoze ari umuyobozi w'ishyirahamwe ry'umupira w'amaguru muri Afrika (CAF), Issa Hayatou yagizwe umuyobozi w'icyubahiro wa CAF.
Ni umuhango wabereye mu gihugu cye cy'amavuko muri Cameroun, witabirwa n'abayobozi
b'impuzamashyirahamwe zigize CAF, ndetse n'umuyobozi w'ishyirahamwe ry'umupira
w'amaguru ku isi (FIFA) Gianni Infantino.
Icyemezo
cyo kugira Issa Hayatou umuyobozi w'icyubahiro wa CAF cyafatiwe mu nama yari yahuje abayobozi ba CAF mu Ukuboza
2020.
Omari
uri gukora mu mwanya w'umuyobozi wa CAF, yatangaje ko ari umwanzuro bafashe
kuko babonaga Issa Hayatou abikwiye. Yagize ati "Dushima cyane akazi
kakozwe mu gihe cy'uyu mugabo by'umwihariko iterambere ry'umupira w'amaguru muri
Afrika, niyo mpamvu natwe twabitekerejeho tubona bikwiye ko yashimirwa."
Umuyobozi
wa FIFA yatangaje ko Issa Hayatou yakomeje guteza imbere umupira w'amaguru
ndetse akagorwa n'ibikorwa bimwe na bimwe ariko byarangiye agaragaje
ubudahangarwa ndetse no gukorera hamwe. Yakomeje avuga ko yishimiye kuba ari
muri Afurika kandi yishimira ibihe byiza yagiranye na Issa Hayatou.
Perezida wa FIFA yitabiriye uyu muhango
Hayatou
wayoboye CAF kuva mu 1988 kugeza mu 2017 na we yafashe ijambo agira icyo avuga.
Yagize ati "Bimwe mu bihe bigoye isi, ni ibi turimo ibi bituma duhana
intera. Ariko nta kundi mureke dusenyere umugozi umwe twubake umupira w'Afurika.
Nshobora kubabwira ngo murabeho mu isi y'umupira w'amaguru, ariko mu by'ukuri nzaguma hano tuzagumana uko bishoboka, rero mureke twishimire iki gikombe cya
Afurika kigiye kubera muri Cameroun".
Issa
Hayatou yatangiye urugendo rwe muri Cameroun ubwo yagirwaga umunyamabanga w'ishyirahamwe
ry'umupira w'amaguru, icyo gihe yari afite imyaka 28. Nyuma y'imyaka ibiri gusa
Hayatou yaje kuba umuyobozi w'ishyirahamwe ry'umupira w'amaguru muri iki
gihugu, ari naho yavuye aba umuyobozi wa CAF mu 1988.
Issa Hayatou ni we muyobozi wa CAF wayoboye igihe kirekire
Mu
myaka 28 yamaze ku ngoma, Hayatou yakozemo ibikorwa byinshi birimo gutegura
imikino yonyine rukumbi y'igikombe cy'isi yabereye muri Afrika, ikabera muri
Afrika y'Epfo mu 2010. Afatwa kandi nk'umwe mu bantu bagize uruhare rukomeye mu
iterambere ry'umupira w'abana ashyiraho amarushanwa y'abatarengeje imyaka 17,
20 na 23 byanatumye ibihugu nka Ghana, Nigeria, ndetse na Cameroun byegukana
ibikombe by'isi mu batarengeje imyaka 17 na 20.
Issa
Hayatou kandi ni we washinze igikombe cya Afrika cy'abakinnyi bakina imbere mu
gihugu CHAN, ndetse anongera umubare w'amakipe yitabira igikombe cya Afrika
CAN, anashinga irushanwa rikinirwa ku mucanga. Ikiragano cye kandi kibukirwa ku
iterambere ry'umupira w'abagore ndetse n'uburyo ibihugu nka Cameroun, Ghana,
Senegal na Nigeria byitwaye mu mikino y'igikombe cy'isi.
TANGA IGITECYEREZO