CAF yahinduye itegeko rya Covid-19 mbere y'uko CHAN 2020 itangira

Ubusanzwe, hari itegeko ryari ryarasohotse tariki 8  Ugushyingo 2020 rivuga ko nibura abakinnyi bacye bashoboka kwitabira umukino ku ikipe yarwaje Coronavirus ari abakinnyi 11 babanzamo ndetse n'umuzamu hakiyongeraho abasimbura bagera kuri bane.

Ku mugoroba w'uyu wa Gatanu mu nama yabereye i Yaounde muri Cameroun yemeje ko iri tegeko rivugururwa, ahubwo ikipe kugira ngo ikine umukino, nibura igomba kuba ifite abakinnyi 11 babanzamo mu gihe nta muzamu urimo bagashaka umukinnyi ukina imbere akajya mu izamu. Nanone kandi mu gihe ikipe idafite abakinnyi bagera kuri 11, izajya itakaza umukino itewe mpaga y'ibitego 2-0.

Iri tegeko rivuguruye muribuka ko ari ryo ryagonze ikipe ya KCCA yo muri Uganda ubwo yari yaje gukina na As Kigali, ikazana abakinnyi 15 ariko ibipimo bya nyuma bikagaragaza ko hari abakinnyi 2 barwaye Covid-19 ibyatumye isigarana abakinnyi 13 bazima bikarangira itewe mpaga y'ibitego bibiri ku busa.