Ndumva umubabaye kundusha: Seburikoko asubiza uwamwibukije gushaka umugore

Ku mugoroba w’uyu wa Mbere tariki 11 Mutarama 2021, Niyitegeka ufite filime ye yise ‘Papa Sava’ yashyize ifoto kuri konti ye ya instagram abwira abafana be n’abakunzi ba filime muri rusange ko mu minsi iri imbere hagiye gusohoka filime nshya y’uruhererakane yitwa ‘Ejo si kera’.

Iyi foto imugaragaza yambaye ipantalo y’ibara ry’umukara n’inkweto ari uko. Nta mupira cyangwa se ishati yambaye hejuru ameze nk’uhese umugongo.

Mu bitekerezo birenga 60, benshi bamubwiye ko bifuza kuzahurira muri filime nawe, abandi bavuga ko biteguye iyi filime, bamwe bamubwira gukomeza urugendo rwo gukina filime kuko benshi bakunda uburyo agaragaza ubuhanga mu gukina kwe.

Mu batanze ibitekerezo kuri iyi foto harimo umukobwa ukoresha izina rya Patierik ufite ifoto imwe kuri konti ye ya Instagram wabwiye Seburikoko gushaka umugore akava mu mikino y’abana. Ati “Shaka umugore va mu mikino y’abana."

Mbere y’uko Seburikoko amusubiza, abafana be babwiye Patierik kureba ibimubera abandi bamubwira ko gushaka umugore nta gihe ntarengwa bigira.

Seburikoko yabwiye Patierik ko ari kumuhatira gushaka umugore nk’aho ari we umubabaye. Ati “Ndumva wamushaka mu mwanya wanjye ukamunyitirira kuko ndumva umubabaye kundusha cyangwa nimushaka azitwa uwawe ko bigutunaje washishikaye washikoye di."

Uyu mukinnyi wa filime yavuze ko atazi niba ab’iwabo wa Patierik "bose bararangije gushaka ngo abone kuza kubimpatamo abitsindagira ". Kandi ko atazi impamvu uyu mukobwa amufitiye impuhwe amusaba gushaka umugore akava ‘mu mikino y’abana’.

Yabwiye uyu mukobwa wavuze ko ari mu mukino y’abana kumwoherereza amafoto y’abana ‘b’iwabo bakina nk’ibyo yari arimo’. Ati “Cyangwa ni kumwe ururimi rwamenyereye kuvuga iyo ruvuze rwifata rugahondagura mu nkaka."

Akomeza ati “Muze kumumbwirira ko nta mwana usya avoma uti ‘ntari mu mikino y’abana (n’ubwo isigaye yishyura menshi niba atabizi) uti ‘buriya ntiyikoreye akabido ntanatengase agacuma, yikweze nk’ugiye kwatsa moteri y’icyuma gishya ibigori we. Hadashya se."

Abantu batandukanye barimo Aime Bahati bunze mu rya Seburikoko bavuga ko ntawe ukwiye guhatira undi gushaka umugore. Seburikoko aboneraho kubwira abantu bose bahora biga ku buzima bw’abandi ko mu cyumweru gitaha ari ikizami.

Mu kiganiro yagiranye na INYARWANDA, ku wa 03 Ukwakira 2020, Niyitegeka Gratien wamamaye nka Seburikoko yatangaje ko nta gitutu afite cyo gushinga urugo, kandi ko nta mwenda abereyemo abantu ku buryo yabyuka mu gitondo atangaza itariki y’ubukwe.

Icyo gihe yavuze ati “Babwire bategereze nta ‘pressure’ ndiho yo kurongora. Nta mwenda mbereyemo umuntu ku kurongora kwanjye. Nibategereze igihe nikigera nzababwira. Wenda na Covid-19 ivemo baze bashagare nk’uko babikeneye. Siko bimeze se! [Akubita agatwenge].

Abiteramo urwenya akavuga ko abamubaza itariki y’igihe azarushingira ‘wagira ngo ni itariki yo gupfa’. Ntiyerura neza niba afite umukunzi, gusa avuga ko abantu bakwiye gutegereza kugeza igihe azabibwirira.

Mu Ukwakira 2020, Niyitegeka Gratien [Seburikoko] yabwiye INYARWANDA, ko nta mwenda abereyemo abamusaba gushinga urugo

KANDA HANO: SEBURIKOKO YAVUZE KO NTA GITUTU AFITE CYO GUSHINGA URUGO

">