RFL
Kigali

Meddy akomeje kuryoherwa n’ikibatsi cy’urukundo

Yanditswe na: Mbarubukeye Etienne Peacemaker
Taliki:28/12/2020 8:01
0

Ngabo Jobert Medard (Meddy) mu bihe bitandukanye yagiye ashyira hanze amafoto yagiranye urugwiro n’umukunzi we Mimi anaherutse kwambika impeta iteguza kubana akaramata nk'uko yabiririmbye. Abakurikiranira hafi umuziki we banemeza ko guhitamo umukunzi bakabana bishobora kumubera umugisha akarushaho gutera imbere.



Kuri ubu amafoto menshi ya Meddy asohoka yerekana ubuzima bwe amenshi ni aba amugaragaraza ari mu munyenga w’urukundo n’umwari wamutwaye umutima akamwibagiza abandi bose ndetse akaba agiye kumukura mu bandi bakabana akaramata mu gihe bitazamo kidobya nka bimwe Christopher ajya aririmba ko rwakonje (gatanya).


Iyi foto yayishyize kuri Facebook ye abamukunda bamwifuriza ahazaza heza ndetse yanayigize 'profile'

Umukobwa watwaye uruhu n’uruhande rwa Meddy yitwa Sosena Afesa [Mehfire] Mimi. Mu 2018 ubwo yari ku rubyiniro mu gitaramo kiruta ibindi cya EAP cyanitabiriwe n’abakomeye barimo abaminisitiri nka Busingye Johnston (Minijust), Nyirasafari Esparance icyo gihe yayoboraga (Minispoc) na Uwihanganye Jean de Dieu wari umunyamabanga wa Leta muri MININFRA, Meddy yateye agahinda benshi bari bazi ko azabatoramo umwe bakabana maze ashyira ku iherezo ku bibazaga uwo yaririmbye mu ndirimbo 'Ntawamusimbura'.

Meddy ku ya 18 Ukuboza mu 2020 yambitse impeta umukunzi we wanatunguwe cyane dore yari yifitiye umunsi w’isabukuru ye atakekaga ko yakwambikwa impeta. Iyo urebye kuri Facebook ya Meddy ifoto iheruka imugaragaza ari gusomama byeruye na Mimi ndetse iyo foto munsi hari bamwe mu bamukunda bamwifuriza kuzahirwa n’urugo kandi biteze ko azanarushaho gutera imbere mu bikorwa bye bya muzika.

Meddy yatangiye umuziki mu 2007 ku ndirimbo 'Amayobera'

Meddy ubwo yarimo asoza amashuri yisumbuye nibwo yakoze indirimbo 'Amayobera' ikamamara ariko abantu batazi nyirayo. Yigeze kuvuga ko hari igitaramo yagiyemo aziko ari busange kitabiriwe aza gutungurwa no gusangayo abantu mbarwa kuko yari afite iyo ndirimbo gusa nta zindi afite. 

Icyakora kuva Meddy yamenyekana kugeza ubu abakurikiranira hafi uregendo rwe rwa muzika bemeza ko atajya abatenguha kandi ko indirimbo ze zarenze imibibi z’u Rwanda ziramamara kugera muri Nigeria aho bamwe mu bahanzi bafite amazina baba bifuza gukorana na we indirimbo ndetse bakanumvikana mu bitangazamakuru basubiramo indirimbo ze ijambo ku rindi. Afite indirimbo 'Slowly' iri mu zarebwe cyane kuri shene ye You Tube dore ko imaze kurebwa n’abarenga miliyoni 41 mu myaka itatu imaze isohotse.

Nta nkuru z’urukundo zigeze zivugwa kuri Meddy dore ko na we kuva mu 2017 yagiye asobanura ko yatangiye gushaka uwo yaterata byazacamo bakabana. Meddy aramutse akoze ubukwe akabana na Mimi yaba agiye mu mibare y’abandi bahanzi b'ibyamamare bafashe icyemezo bagashinga ingo barimo Tom Close, Butera Knowless, Alpha Rwirangira, Safi Madiba, Riderman n’abandi.

Inkuru wasoma bifitanye isano

Meddy yateye ivi yambika impeta y'urukundo umukunzi we ku isabukuru ye y'amavuko


Meddy n'umukunzi we Mimi 






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND