Kigali

Isango na Muzika Awards 2020: Abateje imbere muzika bashyikirijwe ibihembo Isango Star ivugwa imyato - AMAFOTO

Yanditswe na: Mbarubukeye Etienne Peacemaker
Taliki:27/12/2020 15:17
0

Habaye umuhango wo gushyikiriza ibihembo abahanzi, abakinnyi ba sinema bahize abandi, abakoze neza indirimbo mu buryo bw’amajwi n’amashusho ndetse n’ishuri ryo ku Nyundo rishimirwa umusanzu, abanyamakuru barimo Luckman Nzeyimana bavuga imyato Isango Star yabakujije.



Igihe cyose uwakoze neza akaba ibikorwa bye bigaragarira sosiyete aba akwiriye kubishimirwa kabone n'ubwo we yaba abikora atagamije kuronka ishimwe. Hari hashize igihe uruganda rw’imyidagaduro mu Rwanda rukemangwa ku bijyanye n’ibihembo ndetse hari byinshi byagiye bitegurwa ababigenewe bakabisuzugura bitewe n’imitegurire yabyo iba itaravugwagaho rumwe.

Mu 2020 muri Showbiz nyarwanda hagaragaye impinduka mu itegurwa ry’ibehmbo bigenerwa ababa muri rwa ruganda twavuze hejuru. Abakurikiranira hafi imyidagaduro bavuga ko Isango Star iri muri Radiyo zazanye uburyo bushya bwo gukurikiranira hafi ubuzima bw’abahanzi.

Ally Soudi usigaye atuye muri Leta Zunze Ubumwe za Amerika wakoreye Isango Star igihe kitari gito, mu ijambo rito yavuze ko bari abasore bari bafite ubumenyi bavomye kuri radiyo Salus baje i Kigali biyemeza gukomeza wa mujyo kugeza ubwo buri wese yumvise ko umuziki nyarwanda ukwiriye ikuzo. 

Icyo gihe hatangijwe ibiganiro biteza imbere muzika nyarwanda kugeza ubwo ikipe ifite mu biganza 'ISANGO NA MUZIKA', mu mwaka wa 2020 biyemeje gutegura ibihembo byahawe abatowe hakoreshejwe inzira zose zari zarashyizweho.

Ikiragano gishya cy’ibihembo mu ruganda rw’imyidagaduro

Ibihembo bihabwa uwakoze kurusha abandi ntibiba ngombwa ko bishimisha utabihawe dore ko icyo aba asabwa ari ugukora cyane noneho akazegukana ibihembo nta mpaka zibayeho ku bw’ibikorwa byivugira. Bamwe mu baherutse ibihembo muri iri rushanwa, twavuhamo; Gratien Niyitegeka (Best actor 2020), Beatha Mukakamanzi (Maman Nick) wabaye 'Best actress 2020';

Producer Element (Best audio producer2020), Meddy Saleh (Best video director 2020), Bruce Melodie(Best male artist 2020), Alyn Sano (best female artist 2020), Juno Kizigenza (New artist2020), Igare ya Mico the Best (best song 2020), Israel Mbonyi (Best gospel 2020), n'abandi.

Usibye aba hari abahembewe uruhare bagira mu guteza imbere uruganda rw’imyidagaduro mu Rwanda no kuba barafashe inkingi bakayikomeza ya ISANGO NA MUZIKA. Mc Dj Phil Peter wakoreye mu ngata abanyamakuru barimo Ally Soudi, Mike Karangwa agakuza ikiganiro kikamamara yashimiwe urwo ruhare noneho Ally Soudi umucurabwenge wa ISANGO NA MUZIKA ashimirwa ndetse anahabwa igihembo yavuze ko ari icya mbere aronse mu buzima bwe n'ubwo asobanura ko buri munsi Imana imuha ibihembo.


Ishuri rya Muzika ryahoze ku Nyundo rikaza kwimukira i Muhanga umuyobozi waryo wanaritangije mu 2014 bwana Murigande Jacques [Mighty Popo] yashimiwe uruhare ryagize mu kuzana abahanzi bafite impano ariko banasobanukiwe ibijyanye n’umuziki. Nk'ubu iyo urebye ibitaramo bikorwa bikomeye bicurangwa na Symphony band ukaba umusaruro wa rya shuri, abahanzi bahagaze neza muri iyi minsi barimo, Yvanny Mpano, Victor Rukotana, Ariel Wayz, Yverry, Igor Mabano n’abandi tutiriwe turondora bose ni imfura z’ishuri rya Popo wabiherewe ishimwe.


Agatesi Marie Laetitia (Maman Jules) ni we mufasha wa Mugabo Justin (nyiri Isango star), abanyamakuru banyuze ku Isango Star bamushimiye umutima mwiza agaragariza abakozi


Jean Lambert Gatare uyobora ibiganiro (Program Director) ariko wari ahagarariye nyiri Isango Star yashimiye buri wese wagize uruhare kugira ngo ibihembo bigende neza

Kuva mu 2008-2020 Isango Star abo yabereye ikiraro bayirase ibigwi mu itangwa rya Isango na Muzika Awards


Ally Soudi utuye muri Amerika yashimiwe kuba umucurabwenge wa Isango na Muzika

Luckman Nzeyimana umunyamakuru wa RBA ukora ikiganiro kitwa 'Versus' gica kuri Televiziyo Rwanda ubwo yafataga igihembo cya Meddy Saleh na Ally Soudi mu minota mike yahawe, yatanze ubuhamya ndetse yerekana ko mu Isango Star iyo ahaje aba aje mu rugo. Yagize ati: ”Ndibuka neza umushahara wanjye wa mbere ari Isango Star yawumpaye mpamya neza ko uyu munsi abanyamakuru banyuze kuri mikoro za Isango Star ubu bahagaze neza aho bari hose”.

Icyakora ibyo Nzeyimana yagarutseho bifite ishingiro kuko abanyamakuru bakomeye mu ruganda rw’imyidagaduro mu Rwanda mu bihe bya none n’ibyatambutse banyuze ku Isango Star mu buryo bumwe cyangwa se ubundi. Urugero Phil Peter ukorera Isibo Tv uri no mu bivugwa ko bafite agatubutse muri bagenzi be bakorana umwuga umwe wo kuvuga amakuru ya Showbiz yarezwe na Isango star.

Michel Karangwa wamamaye mu biganiro bitandukanye birimo na Sunday Night, umukemurampaka muri Miss Rwanda, ni na we Mighty Popo yiyambaje ubwo bazengurukaga igihugu bashaka abagombaga kuba inkomarume muri rya shuri ryo ku Nyundo, na we yahawe izina na Isango Star. Isheja Sandrine, Murindahabi Irene usigaye afite abahanzi afasha n’andi mazina akomeye bose banyuze ku Isango Star.

Mike Karangwa wayoboye umuhango wa 'Isango na Muzika Awards' asoza yasabye ikipe y’abayikoramo barimo Kadada Kercy, Miss Rebecca, Cedric Shimwayezu na Kavukire Alex (Khalex) ko umuhango nk’uwo bakwiriye kuwugira ngarukamwaka kandi yabasabye kurushaho kunga ubumwe nk’intwaro izabageza ku nzozi barota.

Isango na Muzika Awards yabaye imbonankubone inyura kuri Radiyo na Televiziyo ndetse no ku mbuga nkoranyambaga zose ku buryo uwaba atabashije kuyikurikira yayisanga kuri shene ya You Tube ya Isango Star.

REBA UMUHANGO WO GUSHYIKIRIZA IBIHEMBO ABABYEGUKANYE MURI ISANGO NA MUZIKA AWARDS







TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND