Ijya kurisha ihera hafi n’urugo: Perezida Kagame avuga ku kugeza urukingo rwa Covid-19 mu Rwanda

Umukuru w’Igihugu yabitangaje kuri uyu wa Mbere tariki 21 Ukuboza 2020 mu kiganiro yagiranye n’abanyamakuru n’abaturage cyabaye mu buryo bw’iyakure mu rwego rwo kwirinda icyorezo cya Covid-19 kibasiye Isi muri iki gihe.

Mu kiganiro cyamaze hafi amasaha abiri, Perezida Kagame yagaragarije Abanyarwanda uko Igihugu gihagaze, asubiza ibibazo bitandukanye yabajijwe, ndetse anavuga ko urukingo rwa Covid-19 ruri kugenda ruboneka, ariko nta bantu benshi barakingirwa.

Yavuze ko hari ubwoko butandukanye bw’inkingo harimo izakozwe n’u Bushinwa, izakozwe n’u Burusiya, Abanyamerika n’ibindi bigo byo mu Burengerazuba bw’Isi.

Umukuru w’Igihugu yavuze ko inkingo zatangiye ‘gusohoka’ kandi ko abazikoze bavuga ko zitanga umusaruro. Ko biri gukorwa ku buryo, ‘ibihugu bikomeye’ bishaka kwiheraho, bagakingira abaturage babo mbere y’abandi bose ku Isi.

Perezida Kagame yavuze ko abakoze urukingo bo mu bihugu by’Iburayi no muri Amerika baguze urukingo ‘barafunga ku buryo ibindi bihugu kugira ngo barubone biragoye’.

Yavuze ariko ko hari ubundi buryo bw'umuryango ‘Covax’ bwashyizweho bugamije gushakisha uko urukingo rumaze kuboneka rwagera no ku bindi bihugu nko muri Afurika, Asia n’ahandi’. Ati “Ntibibe ibihugu bikize gusa bigira urukingo’.

Umukuru w’Igihugu yavuze ko u Rwanda rufite amahirwe menshi kuko ruri gukorana n’ibihugu byo mu Burayi n'umuryango wa Covax uzatanga urukingo ku buryo bizoroshya kurubona.

Yavuze ko bitewe n’uburyo u Rwanda rwitwaye mu guhangana n’icyorezo cya Covid-19, byaruhesheje amanota meza yo kujya ku rutonde rw’ibihugu bizabona urukingo rwa Covid-19 mu bya mbere. Ati “Ngira ngo ubwo muri Afurika tuzaba mu ba mbere bashobora kubona urwo rukingo.”

Yakomeje avuga ko hagati y’amezi atatu n’atandatu y’umwaka wa 2021, hari icyizere cy’uko urukingo rwa Covid-19 ruzaba rwatangiye guhabwa abaturwanda.

Umukuru w’Igihugu yavuze ko asanzwe afite n’inshingano yashinzwe n’abanyafurika zo gukurikirana ibijyanye n’ubuzima, uko buri gihugu cyakwegeranya amafaranga yo kwifashisha mu buzima nko guhangana na Covid-19 n’ibindi.

Avuga ko ibi ari amahirwe akomeye ku banyarwanda yo kubona uru rukingo mu ba mbere. Ati “Urumva ko iyo nkurikirana ubuzima bwa Afurika. Ijya kurisha ihera hafi n’urugo. Ubwo niko bizagenda. Ibyari byo byose tuzakoresha ibishoboka byose kugira ngo turebe uko twabigeraho.”

Mu Ugushyingo 2020, inganda zirimo Pfizer, BioNtech na Moderna zatangaje ko zakoze inkingo za Covid0-19 zifite ubwirinzi bungana na 95%.

Ku wa 08 Ukuboza 2020, Margaret Keenam umukecuru w’imyaka 90 y’amavuko yabaye umuntu wa mbere ku Isi wahawe urukingo rwa Covid-19, mu gikorwa cyatangirijwe mu Bwongereza.

Urukingo yahawe ni rumwe muri doze 800,000 z’urukingo rw’ibigo Pfizer na BioNTech.

Perezida Paul Kagame yavuze ko u Rwanda rufite amanota meza mu guhangana na Covid-19, bityo ko ruri mu bihugu bya mbere bizahabwa urukingo rwa Covid-19

Umukuru w'Igihugu yavuze ko afite inshingano zo kureberera ubuzima mu bihugu by'Afurika bityo ko 'Ijya kurisha ihera hafi n'urugo'