Jay Polly na Social Mula mu bahanzi basoje 2020 bahagaze ku manga

Iyo tuvuze ngo ”Umuntu cyangwa ikintu gihagaze ku manga” biba bisobanuye ko kiri mu mwanya mubi ku buryo kitigaruye cyacumbagira cyangwa kikarangira. Abahanzi rero muri ibi bihe bya Coronavirus, ntawakwirengagiza ko hari abasubiye inyuma bitewe n’icyorezo cyugarije isi , Covid-19.

Umuhanzi w’umuhanga, kirazira kikaziririrwa kumara hafi umwaka adakoze indirimbo ikangura abantu, bikaba bibi cyane noneho washyira indirimbo hanze bikamenyekana ko hajemo uburiganya, ukaba washinjwa ubusambo bwo kwiba igihangano cy’undi. Ibi nubwo waburana ugatsinda, usanga abafana bamwe bakwiyomoyeho, kubigarurira rero bisaba kungamo indirimbo ifite imbaraga bakayisamira hejuru.

Mu bahanzi 5, tugiye kuvuga hano hasi, bamwe barakoze ariko izina rigenda rivugwa gacye cyane, nk’ibitari bibitezweho umwaka wa 2020. Hari abandi batari bugaragare muri iyi nkuru kandi nabo batarakoranye imbaraga nyinshi muri uyu mwaka nka Charly na Nina, Christopher n'abandi-impamvu akaba ari uko bo twabagarutseho mu nkuru y'ubushize, yari ifite umutwe ugira uti: Abahanzi 7 b'amazina akomeye bagaragaje imbaraga nke mu muziki mu mwaka wa 2020. 

Abo tugiye kugarukaho cyane muri iyi nkuru ni abahanzi 3 barimo umwe wo mu njyana ya Hiphop, undi wo mu njyana ya RnB ndetse n'undi w'impano itangaje, basoje umwaka wa 2020 bahagaze ku manga mu gihe inkuru y'ubushize yibanze ku bahanzi b'ibyamamare. Umuraperi Jay Polly, Sintex, Social Mula ni abahanzi bakwiriye gukora iyo bwabaga mu 2021 kugira ngo bazahure umuziki wabo kuko mu 2020 batatanze ibyo bari bitezweho mu mboni z'umunyamakuru wanditse iyi nkuru.

1.Jay Polly

Umuraperi w’umuhanga, Tuyishime Josua uzwi nka Jay Polly ni umwe mu bantu bigeze gufata bugwate imyidagaduro yo mu Rwanda kubera ubuhanga bwe no gukora cyane indirimbo zikakirwa neza. Kuva yava muri Gereza mu 2018, ubwo yari yarafunzwe azira gukubia no gukomeretsa umugore we Uwimbabazi Sharifa baje no gutandukana, muzika ye yahise itangira gucumbagira.

Kubera ko muzika ari ikintu udahishira, iyo wavuzwe mu bikorwa, utavuzwe, byose biriranga, Jay Polly rero muzika ye y’uyu mwaka ihagaze nabi, iyo witegereje neza aheruka kumvikana umwaka ushize akiri muri The Mane aho yakoze indirimbo “Inshuti Nyazo” na “Umusaraba wa Joshua”. Abafana ba Jay Polly umwaka wa 2020 nta byishimo babonye.

2. Sintex

Sintex umwe mu bahanzi bari kuzamuka neza mu minsi yatambutse, indirimbo ze zakirwa neza mu itangazamakuru no mu bakunzi ba muzika. Uyu mwaka yarakoze ariko ntabwo ariko yari yitezwe-ibyatumye yumvikana gacye. Hashize hafi amezi 7 nta gihangano cye bwite ahaye abakunzi be.

3. Social Mula

Uyu muhanzi w’umuganga mu ijwi, indirimbo ze zikunze gufata bugwate urubyiruko cyane kubera amagambo y’urukundo aba yiganjemo, ntawakwirengagiza indirimbo ze zirimo iyitwa “Ma vie”, na “Kundunduro”, zamuzamuriye igikundiro mu bakunzi b'umuziki nyarwanda.

Muri uyu mwaka, uyu muhanzi yakoze indirimbo imwe “Marigarita” nayo izamo kidobya ntiyagera kure bitewe n’umuhanzi ukizamuka witwa “Possible” wamushinje kumwika iki gihangano yari yarasohoye mbere ye. Byaje kurangira Social Mula ayisubije, gusa ntiyakundwa bihebuje nk'izayibanjirije. Abafana b’uyu muhanzi twavuga ko uyu mwaka batabonye ibyishimo bari bamutezeho.