Kigali

Umuraperi Young Ace Wayé wo muri Congo Brazzaville yegukanye Prix Découvertes RFI

Yanditswe na: Janvier Iyamuremye
Taliki:10/12/2020 16:40
0

Umuraperi Young Ace Wayé wo muri Congo Brazzaville yegukanye irushanwa ry’umuziki rya ritegurwa na Radio y’Abafaransa, RFI, rizwi nka Prix Découvertes RFI.



Ni mu muhango wabaye kuri uyu wa Kane tariki 10 Ukuboza 2020. Young Ace yegukanye iri rushanwa nyuma ya Celine Baza wo muri Repubulika Iharanira Demokarasi ya Congo wayegukanye mu mwaka wa 2019.

Abategura iri rushanwa bahaye ikaze Young Ace mu bandi banyamuziki batwaye iri rushanwa mu bihe bitandukanye. Bashimira abahanzi 10 bose bageze mu cyiciro cya nyuma cy’iri rushanwa.

Young Ace Wayé ni umuhanzi w'umuraperi. Akiri muto yari umuntu ukunda gushushanya. Mu 2014 yashyize hanze mixtape yitwa ‘The Bone Theory’. Umuziki yawugize umwuga mu 2016.

Uyu muhanzi yari ahatanye n’abarimo Nix Oxy wo muri Congo Brazzaville, Nix Ozay, D6BEL wo muri Chad, Ami Yerewolo muri Mali, Manamba Kanté muri Guinea Conakry, Mike Kayihura wo mu Rwanda na Shan'L wo muri Gabon.

Uretse gukora ibitaramo mu bihugu bikoresha ururimi rw’Igifaransa, umuhanzi wegukanye iri rushanwa anashyigikirwa na Radio Mpuzamahanga y’Abafaransa (Radio France Internationale), Imiryango mpuzamahanga y’Abafaransa nka SACEM, Ubiznewz n’abandi bakomeye.

Umuhanzi wegukanye Prix Découvertes RFI ahabwa amapawundi ibihumbi 10 [Akabakaba miliyoni 10 Frw], agakorera ibitaramo mu bihugu 10 bikoresha ururimi rw’Igifaransa.

Kuva mu gihe cya Guma mu Rugo, abanyempano bo mu bihugu bitandukanye byo muri Afurika batangiye kwiyandikisha mu irushanwa ry’umuziki rya Prix Découvertes RFI.

Abarenga 1,000 bariyandikishije batorwa mo 60 batangazwa muri Nzeri 2020. Mike Kayihura ari mu banyempano 60 batowe, arabimenyeshwa ategereza ubundi butumwa bumubwira ko ahatanye muri iri rushanwa kuva mu Ukwakira 2020.

Ku wa 11 Ugushyingo 2020, ni bwo Céline Banza wo muri Repubulika Iharanira Demokarasi ya Congo (RDC), yatwaye Prix Découvertes RFI 2019.

Yari ahatanye na Social Mula (Rwanda), Bebe Baya (Guinée), Celine Banza (RDC), Cysoul (Cameroun), Lydol (Cameroun), Nasty Nesta (Bénin), NG Bling (Gabon), Yann’Sine (Maroc) na Zonatan (Île Maurice).

Uyu muhanzikazi yegukanye iri rushanwa abisikana n’umuhanzi ukomeye muri iki gihe Yvan Buravan w’imyaka 23 y’amavuko, wegukanye irushanwa ry’umuziki ya ‘Prix Decouverte 2018’, ritegurwa na Radiyo Mpuzamahanga y’Abafaransa (RFI).

Ku nshuro ya kabiri, umuhanzi wo muri Congo Brazzaville yegukanye irushanwa ry'umuziki rya Prix Decouvertes RFI





TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND