Formula 1: Lewis Hamilton yegukanye igikombe cya 7 akuraho agahigo ka Michael Schumacher

Ku Cyumweru tariki ya 15 Ugushyingo 2020, ni bwo hakinwaga agace ka nyuma muri Formula 1 y'uyu mwaka, agace kakiniwe Istanbul muri Turikiya, kasojwe Hamilton yegukanye igikombe cya karindwi. Uyu mukinnyi yaciye agahigo ko kwegukana amasiganwa 94, akaba yahise asiga Michael wegukanye amasiganwa 91 muri F1.

Hmilton w'imyaka 35 y'amavuko yahise akuraho agahigo kari gafitwe n'Umudage Michael Schumacher wari ufite agahigo ko kuba ari we mukinnyi wegukanye ibikombe birindwi mu mukino wo gusiganwa mu tumodoka duto (Formula 1).

Nyuma yo kwegukana iki gikombe, Hamilton yasazwe n'akanyamuneza ndetse n'ibyishimo byinshi, akicaye mu modoka agira ati: "Ngituye abana bato bose bari aha, mutekereze ibikomeye benshi bavuga ko bigoye kubigeraho".

Nk'uko tubikesha ibinyamakuru bitandukanye birimo na BBC, Hamilton yahise asohoka mu modoka ahishura ko kwitwara neza abikesha gukorana n'ikipe nziza, ati: "Birindwi! Ntabwo nabitekerezaga ariko iyo ukoranye n'ikipe nziza kandi mwizerana, mugera kuri byinshi kandi bikomeye". "Ndi kwiyumva nk'aho ari bwo ngitangira".

Hamilton ntabwo arasinya amasezerano mashya n'ikipe ya Mercedes akinira, ahazaza he hakaba hataramenyekana. Hamilton yujuje ibikombe birindwi bya Formula 1 amaze kwegukana, harimo icya mbere yegukanye mu 2008, 2014, 2015, 2017, 2018, 2019 na 2020.

Hamilton yegukanye igikombe cya 7 cya Formula 1