Mukura Victory Sport yasezereye abakinnyi batanu barimo abanyarwanda bane

Abakinnyi basezerewe harimo, Samuel Chukude wari umaze umwaka ageze muri iyi kipe aho yari akomotse mu gihugu cya Ghana. Mutabazi Hackim ni umukinnyi ukina mu mutima w'ubwugarizi, akaba yarageze muri Mukura mu mwaka w'imikino 2019-2020 avuye mu ikipe ya Sunrise. 

Umwungeri Patrick na we ni undi myugariro wasezerewe aho yari amaze umwaka akinira iyi kipe yambara umuhondo n'umukara. Senzira Mansour yavuye muri iyi kipe avuye muri Espoir FC akaba yakinaga mu bwugarizi kuri 3, akaba yarakundaga gusimburana na Mutijima Janvier kuri uwo mwanya gusa birangiye urugendo rwe na Mukura rurangiye ku mugoroba wo kuri 7 Ugushyingo 2020. 

Mbazumutima Mamadou ni umukinnyi wa 5 wasezerewe na Mukura, uyu mukinnyi yageze muri Mukura avuye mu ikipe ya Sunrise FC mu mwaka w'imikino 2019-2020.

Mukura ubu iri mu mwiherero wo kwitegura umwaka w'imikino 2020-2021 ikaba ifite n'abakinnyi bashya yasinyishije izakoresha muri uyu mwaka ugiye kuza.