Kigali

Amagorwa y’abakobwa bakoreshwa akazi ka nijoro, isomo kuri bagenzi babo

Yanditswe na: Clementine Uwiringiyimana
Taliki:7/11/2020 22:02
0

Abagore n’abagokobwa batazwi umubare babayeho mu mwijima nyuma yo kwisanga bakoreshwa imirimo y’ubucakara baba barajyanywemo bizezwa akazi keza n’umushahara ufatika.



Ubuhamya bw’abagize amahirwe yo kurokoka icuruzwa ry’abantu bwumvikanisha neza ko bari babayeho nk’inkoreragahato, bakorera ku bwoba, igitsure, babayeho mu mubabaro, gutenguhwa n’ibindi.

Mary ni umwe mu bakobwa batanze ubuhamya nyuma yo gucika aba bagizi ba nabi. Ishami ry’umuryango w’abibumbye ryita ku bagore ‘unwomen’ rivuga ko abagore n’abakobwa batwarwa muri ubu buryo 3 muri 4 bakoreshwa uburaya.

Iwabo wa Mary ni muri Nigeria mu gace babayeho nabi kubera ko hahora intambara z’umutwe wa Boko Haram. Ni mu giturage kidafite amashuri ahagije, ibihumbi by’abana bafite ikibazo cy’imirire mibi.

Uyu mukobwa w’imyaka 17 wabonaga adafite icyizere cy’ejo hazaza yifuzaga ko yabona amahirwe y’ubuzima hanze y’igihugu cye. Yahujwe n’umugabo witwa Ben kuri telephone, amwemerera ku mwishyurira itike y’indege ikamugeza mu Butaliyani, agakora akazi ko muri resitora.

Muri Werurwe 2016 nibwo yagejejwe muri Libya aho bategerereza ubwato bubajyana I Burayi. Yari kumwe n’itsinda ry’abahungu n’abakobwa. Mbere y’uko bahaguruka babanza kurahirira imbere y’umupfumukazi ko batazatoroka.

Ubwato bubajyana I Burayi bwahagurutse muri Libya tariki 11 Kanama 2016. Mbere y’uko ubwato buhaguruka muri Libya Mary yasogongejwe ku mubabaro agiye kwinjiramo.

Agira ati {“Ben yarampagaye, anahamagara undi mukobwa amuha undi mugabo, arambwira ngo nintemera ko ansambanya, arampa undi mugabo, n’ibyo kujya mu Burayi bihagararire aho. Yamfashe ku ngufu”}.

Uyu mukobwa ukomoka mu gace ka Benin mu gihugu cya Nigeria yashatse aho yatorokera arahabura. Yamaze amezi 5 we na bagenzi be bategereje ubwato buzabakura muri Libya, aho bahabwaga ibiryo by’intica ntikize.

Akimara kwinjira mu bwato, bwari bumujyanye mu Butaliyani, nibwo abari bamujyanye bamubwiye ko azajya aba mu kigo, akoreshwa ubusambanyi.

Uyu mukobwa yaje kugira amahirwe ubwato yarimo bufatwa n’abashinzwe umutekano b’u Butaliyani. Ubwato bugeze ku nkombe yahasanze umunyamategeko witwa Gilda amubarira inkuru y’uko byamugendekeye.

Mary amusubiriramo amagambo yabwiye abari bamujyanye, bakimubwira ko agiye gukoreshwa ubusambanyi. Ngo yarababwiye ati “Sinshobora kwicuruza. Mfite ahazaza. Kugurisha umubiri wanjye byanyangiriza ubuzima, igitinyiro n’ibindi”.

Abari bamwishyuriye itike, bamusabye ko abasubiza itike yabo yari amaze gukoresha kuva muri Nigeria agera mu Libya, bamubwira ko natayibaha nyina ariwe bazabiryoza.

Nyuma y’ibyumweru bibiri atabawe n’abashinzwe umutekano b’u Butaliyani yari atarabona ibyangombwa by’inzira ngo abone uko asubizwa iwabo muri Nigeria, inkuru yarahamusanze amenya ko ba bantu bari bamutwaye basubiye muri Nigeria babwira nyina ko yatorotse. Bambika nyina amapingu baramujyana, bavuga ko bazamurekura ari uko Mary abasubije amafaranga y’urugendo bamutanzeho.

Urubuga rwa unwomen.org rutangaza ko uyu mukobwa n'ubwo agifite agahinda k’uko atarabona uko asubira iwabo muri Nigeria, afite intego y’uko nasubira iwabo azakora uko ashoboye akiga akazaba umunyamategeko akaburanira abakobwa bacuruzwa.






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND