RFL
Kigali

Nyiranyamibwa Suzanne yasabye urubyiruko kurangwa n’urukundo nk’intwaro Kamaliza yakomeyeho-VIDEO

Yanditswe na: Janvier Iyamuremye
Taliki:6/11/2020 15:39
0

Nyiranyamibwa Suzanne, umuhanzikazi wagwije ibigwi mu muziki yasabye urubyiruko rw’u Rwanda, kugira imizi y’urukundo irandaranda kurusha gukunda ibintu n’amafaranga kenshi bitaba akarenge kabagara ubushuti.



Nyiranyamibwa ni umuhanzikazi ubimazemo imyaka myinshi, azwi cyane mu ndirimbo zo Kwibuka Jenoside yakorewe Abatutsi muri Mata 1994 n’izisanzwe zirimo ‘Ndavunyisha’, ‘Nimuberwe bakobwa’, ‘Telefone’, ‘Nkumbuye Iwacu’ n’izindi. 

Uyu muhanzikazi wamenyekanye cyane mu itorero Isamaza, yajyaga yumva indirimbo za Mutamuliza Annociata [Kamaliza] akamutekerezaho yiyumvisha ko ari umukobwa munini cyane, ariko bahuye atungurwa n’uko ari umukobwa w’urubavu ruto wuje urukundo.

Babanye mu gihugu cy’u Bubiligi mu gihe cy’amezi ane. Bongera guhurira mu bitaramo byazengurutse u Rwanda bashakisha inkunga yo guha impunzi zari muri stade no mu bindi bice by’u Rwanda. 

Nyiranyamibwa Suzanne yari umwe mu bantu bibutse Kamaliza nyuma y’imyaka 24 yitabye Imana. Iki gikorwa cyabaye kuri uyu wa kane tariki 05 Ugushyingo 2020, ku irimbi rya Gisirikare i Kanombe mu Mujyi wa Kigali.

Nyiranyamibwa avuga ko nubwo mu mwuga w’ubuhanzi habamo ibicantenge, atigeze abona n’umunsi n’umwe Kamaliza yarakaye. Ngo yajya yumva indirimbo ze akumva aranezerewe, bahuye ibyishimo byuzura umutima we.

Yabwiye INYARWANDA, ko Kamaliza yamubereye umwana n’umuvandimwe, urupfu rwe ruramushegesha mu buryo bukomeye ntiyabona n’uko yifatanya n’abandi mu kumushyingura bitewe n’uko yari mu mahanga.

Suzanne avuga ko Kamaliza yari afite umutima udasanzwe, ku buryo hari igihe bakoraga bakaruha ariko we agakomeza gukora akazi. Ati “Kamaliza yari intwari. Ibyo bamwe muri twe abenshi tutashobora kandi turi bakuru. Utinye umuntu wiyibagirwa ahubwo akabaho kubera abandi. Niko yari ateye.”

“Nta kintu cyamukomaga imbere, iyo yumvaga ahantu hari ikibazo yabaga yagezeyo. Habaka hari n’ubwo mubwira nti ‘ariko ntunanirwa’ akambwira ati ‘tante uragira ngo ngire nte. Tugende.”

Yavuze ko Kamaliza yaranzwe n’urukundo, akunda abantu mu buryo bwihariye, afasha imfubyi, aritanga atizigamye. Ni urugero rwiza abona ko urubyiruko rukwiye kumufatiraho ntirushyire imbere amafaranga n’ibintu gusa.

Uyu muhanzikazi avuga ko ubikire bwa mbere ari urukundo, kuko urufite atagira ishyari, akunda mugenzi we nk’uko yikunda kandi agakunda n’Igihugu cye. Ati “Ubukire urubyiruko rukwiye kumenya ni urukundo. Iyo ukunda uba ukize.”

Yavuze ko urubyiruko rw’iki gihe rwatese, kandi atari ko byakagenze. Avuga ko intwaro ya mbere urubyiruko rukwiye kugira muri iki gihe ari ukurangwa n’urukundo nk'urwaranze Kamaliza.

Ati “…Kandi ikintu kirimo urukundo rubyiruko mukwiye kumenya, nta kintu gishobora kugitsinda. N’icyo kintu Kamaliza yari intwaro ye. Iyo ukunda ntabwo ushobora guhemuka, nta nubwo ubitekerezaho, ntibiba mu mutwe wawe. Nicyo urubyiruko rwari rukwiriye kureberaho Kamaliza; yarakunze, yarakunzwe.”

Suzanne yavuze ko ubukire bwa mbere umuntu agira bukomeye ari urukundo nk'urwaranze Kamaliza


Nyiranyamibwa Suzanne n'umuhanzikazi Clarisse Karasira bashyira indabo ku mva ishyinguyemo Kamaliza


Uwanjye Mariya Mukuru wa Kamaliza n'umuhanzikazi Clarisse Karasira

Kanda hano urebe amafoto menshi:

KANDA HANO UREBE UKO UMUHANGO WO KWIBUKA KA KAMALIZA WAGENZE

">






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND