David Olney; Umuhanzi wababaje benshi uyu mwaka ubwo yapfiraga ku rubyiniro ari kuririmba! Dore uko byagenze

Mutarama 2020, ubwo yari mu iserukiramuco ry'abanditsi b'indirimbo ryiswe “30A Song Writers Festival” ryabereye i Santa Rosa Beach, muri Floride, yapfuye ubwo yaririmbaga ari ku rubyiniro (stage) nyuma yo gusaba imbabazi imbaga y'abantu. Umuganga wari mu bari bateraniye aho, yasatariye David Charles Olney agerageza kumuhumuriza no kumubyutsa ariko asanga yashizemo umwuka.

Uyu musaza, yapfuye ubwo yari ageze hagati mu ndirimbo ye ya gatatu mu zo yari kuririmba, imbaraga zirabura ashyira gitari hasi asaba imbabazi imbaga nyamwinshi maze ava ku isi. Umucuranzi Amy Rigby, wari gucurangira David, icyo gihe yatambukije ubutumwa ku mbuga nkoranyambaga agira ati: "David Olney, umugabo mwiza, umunyabigwi, umusizi wandika indirimbo, yarapfuye ari ku rubyiniro. Olney yari hagati y'indirimbo ye ya gatatu ubwo yahagararaga, agasaba imbabazi maze ahumura amaso arongera aragoheka, twavuga ko twari tukimukeneye, yicaye neza yambaye gitari ye, yambaye ingofero nziza cyane n'ikoti ryiza maze arapfa”.

David Charles Olney, yari umuririmbyi, umucuranzi kabuhariwe wa Gitari, yanditse Alubumu zirenga 20 mu myaka hafi 50 yari amaze akora umuziki. Indirimbo ze zashyizwe ahagaragara n'abahanzi benshi, barimo Emmylou Harris, Del McCoury, Linda Ronstadt na Steve Earle. 

David Olney yavutse ku ya 23 Werurwe 1948, avukira i Providence, ku kirwa cya Rhode. Amaze kwiga muri kaminuza ya Carolina y'Amajyaruguru muri Chapel Hill, yinjiye mu itsinda rya Simpson rya Bland Simpson. Banditse alubumu imwe i New York mu 1971.

Umwaka ukurikira yimukiye i Atlanta, maze mu 1973 yimukira i Nashville. Mu ntangiriro ya za 1980, yashinze itsinda The X-Rays, ryanditse alubumu ebyiri muri Rounder Records, maze ritandukana mu 1985.  Mu myaka mirongo yakurikiyeho, Olney yakoze nk'umuririmbyi ukora muzika ku giti cye, asohora Alubumu zirenga 20 harimo esheshatu zafashwe amajwi yakoranye n'abahanzi nka John Hadley na Sergio Webb. 

David Olney yapfiriye ku rubyiniro