Kigali

Abakinnyi 10 bakomeye bashobora kugendera ubuntu mu mwaka w’imikino 2021 niba ntagihindutse

Yanditswe na: ISHIMWE Olivier Ba
Taliki:14/10/2020 7:58
0

Isoko ry’igura n’igurisha mu 2021 dushobora kuzabona abakinnyi nka Edinson Cavani bazagenda bishakiye ikipe kuko amasezerano yabo azaba yarageze ku musozo ariko ntiyongerwe. Ubundi umukinnyi yongera amaserezerano nk'igihembo cy'uko ari kwitwara neza mu ikipe arimo cyangwa bikaba mu buryo bwo ku mwima andi makipe amushaka.



Kuri uru rutonde hariho abakinnyi bamaze igihe mu makipe yabo ariko akaba yaratinze kubongerera amasezerano bitewe n’impamvu zitandukanye, ni abakinnyi benshi ariko twabahitiyemo abakinnyi 10 bafite amazina.

Lionel Messi


Messi kuva ku myaka 13 ishize ni umukinnyi wa FC Barcelona, igitangaje kuri ibi ni uko buri mwaka Messi byavugwaga ko ashobora kuva muri iyi kipe ariko amaso yaheze mu kirere. Isoko ry'igura n'igurisha riheruka, habaye ibiganiro bikomeye kugira ngo Messi agume muri Barcelona, dore ko ikipe ya Manchester City yamushakaga cyane. Messi yinjiye mu mwaka we wa nyuma bivuze ko aramutse atongereye amasezerano vuba bizarangira agendeye ubuntu cyangwa yigurishije.

David Alaba


Uyu myugariro wa Bayern Munich yageze muri iyi kipe mu 2008 gusa ibintu ntabwo biri kugenda neza, dore ko umuntu ushakira akaryo uyu mukinnyi aherutse kubwirwa nabi n'ubuyobozi bwa Bayern Munich ko ngo ayoborwa n'amafaranga cyane ari byo bituma Alaba atongera amasezerano. Alaba ufite imyaka 28 y'amavuko, arashaka Miliyoni 11 z'amayero kugira ngo yongere amasezerano mu gihe ku ruhande rwa Bayern bo babona byaba ari uguhendwa. Mu gihe kumvikana byagumya kwanga, byarangira uyu mukinnyi yigurishije cyamgwa akagenda ku buntu.

Gianluigi Donnarumma

 

Umunyezamu wa AC Milan biratangaje kuba umunyezamu wa mbere kandi muto agera mu mwaka we wa nyuma atarongererwa amasezerano. Uyu musore w'imyaka 21 atangaza ko ikipe afatira yananiwe guhanganira igikombe cya shampiyona ari byo bizatuma amasezerano ye narangira ashobora kwigendera yigurishije.

Sergio Aguero


Yageze muri Manchester City mu mwaka 2011 avuye mu ikipe Atletico Madrid. Aguero ubu ari mu mwaka we wa nyuma w'imikino bimwemerera kuba yajya mu ikipe ashaka ndetse yiteguye no kuba yayivugisha. Uyu musore ni we munyamahanga watsinze ibitego byinshi muri Premier league.

Mesut Ozil


Kuva mu mwaka wa 2013 ni umukinnyi wa Arsenal ariko ibintu ntabwo biri  kugenda neza nyuma y'aho atakibona umwanya ubanza mu kibuga muri iyi kipe yambara umweru n'umutuku. Ozil n'ubwo aheruka mu kibuga muri Werurwe 2020, ariko ni we mukinnyi wa Arsenal uhembwa amafaranga menshi. Mu gihe ntagihindutse ngo Arsenal isinyishe amasezerano mashya Ozil, umwaka utaha w'imikino azagendera ubuntu kandi nta nkurikizi.

Sergio Ramos


Kapiteni w'ikipe ya Real Madrid ndetse n'ikipe y'igihugu ya Espagne, yageze muri Real mu 2005 ndetse aza no kuba umwe muri ba myugariro bakomeye kuri iy'isi. Ramos ari mu mwaka we wa nyuma kandi biteye impungenge kuko iyi kipe ikunze kongerera amasezerano y'umwaka  umwe abakinnyi barengeje imyaka 32 kandi Ramos ibyo ntabikozwa, rero ntagihindutse Ramos umwaka utaha tuzamubona agenda ku buntu cyangwa yigurishije.

David Luiz


David Luiz yageze mu ikipe ya Arsenal mu 2019 ndetse nyuma yaho yongera amasezerano y'umwaka umwe azamugeza mu 2021. Ikipe ya Arsenal yarifashe ku bijyanye n'amasezerano ya Luiz kuko babona bafite abakinnyi benshi kandi bakiri bato. Arsenal nikomeza kwifata byarangira David Luiz agendeye ubuntu.

 Paul Pogba


Kuva mu 2009 kugeza mu 2012 Pogba yari umukinnyi wa Manchester United ahava yerekeza muri Juventus, mu 2016 yaje kuhava agaruka muri Manchester United. Amasezerano yasinyanye na Manchester United azagera ku musozo mu mwaka utaha w'imikino. Pagba kandi ntabwo yishimiye imikinire ndetse n'umusaruro wayo bituma hari amakuru amwerekeza muri Real Madrid akajya kubana na mwene wabo Zinedine Zidane.

Diego Costa


Wamwanga wamwemera, imbaraga ze zishimwa na benshi gusa kuva Luis Suarez yagera muri iyi kipe bisa naho Costa ashobora kutongererwa amasezerano. Atletico Madrid itangaza ko kuva uyu mukinnyi bamukura muri Chelsea arangwa n’imvune, ari nabyo bagenderaho bamutakariza icyizere.

Julian Draxlar


Umwe mu bakinnyi bafite impano kandi bakiri bato yageze mu ikipe ya PSG mu 2017 avuye mu ikipe ya Wolfsburg. PSG itangaza ko ihugijwe n'amasezerano ya Neymar ndetse na Mbappe dore ko amasezerano yabo azarangira mu 2022 ariko ibiganiro bigoye bisaba gutangira kare. Ntagihindutse Julian Draxler ashobora kuzagendera ubuntu mu mwaka utaha w'imikino agatera ikirenge nk'icya Edinson Cavani wagendeye ubuntu na we avuye muri iyi kipe.






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND