Incamake y'igitabo 'Ihanamakuru rigamije guteza imbere umurage ndangamuco w'u Rwanda' cya Mutangana Steven

Ni igitabo yise "La Communication pour la valorisation du patrimoine culturel du Rwanda" (tugenekereje mu kinyarwanda, iki gitabo cyitwa Ihanamakuru rigamije guteza imbere umurage ndangamuco w'u Rwanda).

Iki gitabo kigaragaza icyo umuco n'umurage ndangamuco ari cyo, umurage ndangamuco ufatika n'udafatika (Patrimoine culturel materiel et Patrimoine culturel immateriel) n'ubukungahare bw'uyu murage mu Rwanda.

Muri iki gitabo kandi hagaragaramo uko itangazamakuru rikwiriye kumenyekanisha uyu murage ndangamuco, dore ko muri iki gihe itangazamakuru rifite uruhare rukomeye mu buzima bwa buri munsi bw'abatuye Isi n'Abanyarwanda by'umwihariko.

Kuryifashisha rero bikaba ari uguhitamo umuyoboro mwiza. Iki gitabo cyasohowe n'inzu isohora ibitabo ku rwego mpuzamahanga y'iburayi ya ‘Editions Universitaires Européennes’.

Mu kiganiro na INYARWANDA, Mutangana Steven yavuze ko yanditse iki gitabo ashishikariza abari mu mwuga w'Itangazamakuru guharira umwanya mwiza umuco w'u Rwanda n'ibikorwa ndangamuco mu itangazamakuru.

Mutangana ati "Umurage ndangamuco w'u Rwanda umenyekanishwe mu itangazamakuru. Bizagira uruhare rukomeye mu gushimangira ibiranga Abanyarwanda nk'umuryango umwe, uhuje umuco, bizafasha kandi guhererekanya umurage hagati y'abakuru n'ababyiruka, no kugaragaza uko ubyazwa inyungu mu iterambere ry'ubukungu."

Iki gitabo yacyanditse nyuma y'amashuri yarangije ku rwego rwa Masters mu ishami ry'umuco muri kaminuza mpuzamahanga ya Francophonie ifite icyicaro gikuru mu Misiri, mu mujyi wa Alexandria.

Mutangana Steven yarangije icyiciro cya gatatu cya Kaminuza (Masters) mu ishami ry'umuco muri Kaminuza mpuzamahanga ya Francophonie ifite icyicaro gikuru mu Misiri mu Mujyi wa Alexandria.

Mutangana Steven wanditse igitabo kivuga ku murage ndangamuco w'u Rwanda n'uko Itangazamakuru rikwiye kuwumenyekanisha