RFL
Kigali

Aubameyang yafashije Arsenal kuzamuka ku rutonde rwa shampiyona nyuma yo gutsinda Everton - AMAFOTO

Yanditswe na: SAFARI Garcon
Taliki:24/02/2020 12:33
0


Ku Cyumweru ku kibuga cya Emirates giherereye mu mujyi rwagati wa London habereye ibirori bya ruhago, ubwo ikipe ya Arsenal imeze neza kuva Mikel Arteta yayigeramo nk’umutoza mukuru, yatsindaga Everton ibitego 3-2, byanayifashije kuzamukaho umwanya umwe ku rutonde rwa shampiyona y’u Bwongereza.



Ikipe ya Arsenal yatangiye neza umwaka wa 2020, kuko kugeza kuri ubu itaratsindwa umukino n'umwe muri uyu mwaka mu mikino 10 imaze gukina, mu marushanwa atandukanye.

Umukino wo ku mugoroba Arsenal yatsinzemo Everton ibitego 3-2, wuzuzaga imikino 10 Arsenal ikinnye muri uyu mwaka wa 2020, ikaba idaheruka icyitwa intsinzwi kuko yatsinze imikino itandatu inganya imikino ine.

Muri uyu mukino wabereye ku kibuga cya Emirates kuri iki cyumweru, ntabwo Arsenal yatangiye neza kuko ikinjira mu kibuga ku munota wa mbere gusa Everton yahise iyitsinda igitego cyatsinzwe na Dominic Calvert-Lewin ku burangare bwa ba myugariro ba Arsenal.

Arsenal yari imbere y’abafana bayo yahise ijya ku gitutu cyo gushaka igitego cyo kwishyura, yakinnye neza mu kibuga hagati irema uburyo bwinshi bwari kubyara ibitego ariko ibyo bagerageje gukora ntibibahire.

Ku munota wa 27’ Eddie Nketiah w’imyaka 20 y’amavuko yishyuye igitego ku mupira mwiza yahawe na Bukayo Saka uhagaze neza muri iyi kipe yiyitirira abarashi.

Ku munota wa 33’ rutahizamu akanaba kapiteni wa Arsenal Pierre Emerick Aubameyang yatsinze igitego cya kabiri cya Arsenal ku mupira wari uvuye kwa David Luiz. Igice cya mbere kigana ku musozo ku munota wa 45’ rutahizamu ukomoka mu gihugu cya Brzil Richarlison yatsindiye Everton igitego cya kabiri cyo kunganya ku mupira yahawe na Yerry Mina.

Byatumye amakipe yinjira mu karuhuko anganya ibitego 2-2.

Arsenal yakomeje gukina neza ihusha uburyo butandukanye, yabonye igitego cy’intsinzi igice cya kabiri kigitangira ku munota wa 46’ cyatsinzwe na Aubameyang ku mupira yahawe na Nicolas Pepe. Aubameyang yatowe nk'umukinnyi wigaragaje kurusha abandi muri uyu mukino.

Gutsinda uyu mukino byatumye Arsenal yuzuza imikino 10 iheruka idatsindwa, inazamuka ku rutonde rwa shampiyona y’u Bwongereza, aho yavuye ku mwanya wa 10, kuri ubu ikaba igeze ku mwanya wa Cyenda n’amanota 37.

Arsenal izongera guseruka mu kibuga tariki 27/02/2020 yakira Olympiacos ku kibuga Emirates mu mukino wo kwishyura muri UEFA Europa League, aho umukino ubanza Arsenal yari yatsindiye mu Bugereki igitego kimwe ku busa.

UKO INDI MIKINO YAGENZE

Manchester United 3 – 0 Watford

Wolverhampton Wanderers 3 – 0 Norwich City

Arsenal 3 – 2 Everton


Arsenal imaze imikino 10 yikurikiranya idatsindwa



Aubameyang yabaye umukinnyi w'umukino


Aubameyang yatsinze ibitego bibiri muri uyu mukino


Eddie Nketiah watsinze igitego cya mbere cya Arsenal



Abakinnyi ba Arsenal bishimira intsinzi


Mikel Arteta yishimira uburyo ikipe ye iri kwitwara muri iyi minsi






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND