Ahabanza Imikino

Premier League: Liverpool yateye intambwe yerekeza ku gikombe, Arsenal itangira gukuramo akarenge

Yanditswe na: Aloys Niyonyungu
Taliki:27/02/2025 0:24 0

Ikipe ya Liverpool yatsinze Newcastle United itangira gutanga ibimenyetso byo gutwara igikombe, Arsenal inganya na Nottingham Forest naho Manchester United itsinda Ipswich Town mu mikino yo ku munsi wa 27 wa shampiyona y'icyiciro cya mbere mu Bwongereza.

Ni mu mikino yakinwe kuri uyu Wa Gatatu tariki ya 26 Gashyantare 2025.

Saa yine n'iminota 15 z'ijoro Liverpool yari yakiriye Newcastle United kuri Anfield.Uyu mukino watangiye ikipe ya Liverpool ihererekanya neza ishaka aho yamenera ngo igere mu rubuga rw'amahina gusa bikaba ikibazo.

Ku munota wa 11 iyi kipe yaje kubona igitego gitsinzwe na Dominic Szoboszlai ku mupira yarahawe na Luis Diaz.

Nyuma yo gutsindwa ikipe ya Newcastle United yagiye inyuzamo igasatira ikoresheje uburyo bwo kwirukankana imipira nkaho Jacob Murphy yabikoze gusa yarekura ishoti rikanyura hejuru y'izamu kure.

Ku munota wa 35 Liverpool yari ibonye igiye cya kabiri ku mupira Diogo Jota yarahaye Dominic Szoboszlai arekura ishoti ari inyuma y'urubuga rw'amahina gusa rinyura hepfo y'izamu gato cyane.

Igice cya mbere cyarangiye Liverpool ikiyoboye n'igitego 1-0. Igice cya kabiri cyatangiye ikipe ya Newcastle United isatira cyane ishaka uko yakwishyura binyuze ku bakinnyi bayo basatira barimo Callum Wilson.

Ku munota wa 62 ikipe ya Liverpool yabonye igitego cya kabiri gitsinzwe na Alexis Mac Allister ku mupira yarahawe na Mohammed Salah.

Liverpool yakomeje gusatira cyane ishaka igitego cya 3 ndetse Mohamed Salah akabona uburyo imbere y'izamu gusa ntibimukundire kububyaza umusaruro.

Umukino warangiye Newcastle United itsinzwe ibitego 2-0.

Indi mikino yakinwe Manchester City yatsinze Tottenham Hotspur 1-0 cya Erling Haaland ku munota wa 12 naho Arsenal yo inganya na Nottingham Forest 0-0.

Ni mu gihe kandi Manchester United yatsinze Ipswich Town ibitego 3-2. Ni ibitego bya Sam Morsy witsinze ku munota wa 22, Matthijs de Light ku munota wa 26 na Harry Maguire ku munota wa 47 ahawe umupira na Bruno Fernandes.

Kugeza ubu ikipe ya Liverpool iracyayoboye urutonde rwa shampiyona n'amanota 67, Arsenal ikaba kumwanya wa 2 n'amanota 54, Nottingham Forest kuwa 3 n'amanota 48 naho Manchester City yo ikaba kumwanya wa 4 n'amanota 47.

Ni mu gihe Newcastle United yo iri kumwanya wa 6 n'amanota 44, Tottenham Hotspur ikaba kuwa 13 n'amanota 33 inganya na Manchester United iri kumwanya wa 14.