Premier League: Arsenal na Liverpool byivanze

Iyi mikino yakinwe kuri wa Gatandatu taliki ya 14 Ukuboza 2024 Saa kumi n'imwe. Kuri Emirates Stadium, ikipe ya Arsenal yari yakiye Everton.

Uyu mukino watangiye ikipe ya Arsenal iri hejuru binyuze ku bakinnyi bayo barimo Gabriel Martinelli gusa amahirwe babonaga ntibayabyaze umusaruro.

Iyi kipe bitirira Abarashi yakomeje gukina neza ikanabona imipira y'imiterekano dore ko isanzwe inamenyereweho kuyibyaza umusaruro itsinda ibitego by'imitwe ariko kuri iyi nshuro byagoranye kuko ba myugariro ba Everton babaye ibamba.

Ikipe ya Everton nayo hari aho yabonye uburyo aho Dominic Calvert-Lewin yari asigaranye n'umunyezamu arekura ishoti ariko David Raya arishyira muri koroneri.

Ku munota wa 29 Martin Odegaard yahawe umupira mwiza na Bukayo Saka arekura ishoti rinyura mu maguru ya bamyugariro ariko ku bw'amahirwe macye rinyura hepfo y'izamu gato cyane.

Igice cya mbere cyarangiye amakipe yombi anganya 0-0. Mu gice cya kabiri ikipe ya Arsenal yaje ikomeza gusatira ishaka igitego nk'aho Bukayo Saka yacenze agera mu rubuga rw'amahina arekura ishoti, gusa Jordan Pickford aratabara ashyira umupira muri koroneri itagize icyo itanga.

Everton yakomeje kurushwa mu bijyanye no guhererekanya umupira cyane ariko ba myugariro barimo Branthwaite na Tarkowski bakomeza gukora akazi bakuraho imipira iremereye yashoboraga guteza ibibazo.

Umutoza wa Arsenal, Mikel Arteta yakoze impinduka mu kibuga ashyiramo abarimo Gabriel Jesus, Leandro Trossard, Thomas Partey n'abandi ariko kubona igitego biranga birangira banganyije na Fulham 0-0. Uyu ni umukino wa kabiri wikurikiranya iyi kipe inganyije nyuma yuko yaherukaga kunganya na Fulham.

Undi mukino wabaye ni uwo ikipe ya Liverpool yari yakiriyemo Fulham. Warangiye amakipe anganya ibitego 2-2 nyuma yuko umukinnyi wa Liverpool, Andrew Robertson yari yabonye ikarita y'umutuku ku munota wa 17.

Kugeza ubu Liverpool iracyayoboye urutonde rwa shampiyona n'amanota 36, ikaba ikurikiwe na Chelsea n'amanota 31 mu gihe Arsenal yo iri ku mwanya wa 3 n'amanota 30.