APR WBBC yazanye umukinnyi wubatse amateka muri NBA

Ikipe ya APR WBBC, mu makipe azahagararira u Rwanda mu mikino Nyafurika y’Abagore mu mukino wa Basketball (Africa Women’s Basketball League), iritegura neza iyi mikino izabera i Dakar muri Sénégal kuva tariki ya 6 kugeza kuya 15 Ukuboza 2024. Mu rwego rwo kwiyongerera amahirwe yo guhatanira umwanya mwiza, APR WBBC yongeyemo Kierstan Bell, umwe mu bakinnyi bafite ibigwi byihariye muri shampiyona ya NBA y'abagore .

Kierstan Bell, ukina nka Guard muri Las Vegas Aces, yaje gufasha APR WBBC mu rugendo ruyitegereje. Uyu mukinnyi w’imyaka 24, muri  muri WNBA yegukanye ibikombe bibiri bya shampiyona mu 2022 na 2023.

Nubwo yagize imvune yatumye adakina neza mu mwaka wa shampiyona uheruka, ubuhanga n’ubunararibonye bwe bikomeje kumushyira mu bakinnyi bakomeye bazaboneka muri iri rushanwa Nyafurika.

APR WBBC ifite intego yo guharanira ishema ry’igihugu izajyana na REG WBBC, nayo mu Rwanda. Ubufasha bwa Bell buzunganira ibikorwa by’umutoza n’abakinnyi basanzwe bigaragaza muri iyi kipe.

Uretse Kierstan Bell, APR WBBC ifite Italee Lucas na Shaina Pellington, bombi bagaragaye neza mu mikino ya Zone V yabereye muri Zanzibar, aho bafashije iyi kipe kwegukana umwanya wa Gatatu. Gusa ikipe yatandukanye na Chanel Mokango, undi mukinnyi wari ufite uruhare rukomeye mu mikinire yayo. Uru rwego rwo gushakisha impano nshya rugamije gutuma APR WBBC ihangana n’amakipe akomeye yo ku rwego mpuzamahanga.

Uretse APR WBBC na REG WBBC, amakipe akomeye aturutse mu bice bitandukanye by’Afurika azitabira iyi mikino. Ayo makipe ni AS Ville Dakar (Sénégal), Sporting Alexandria (Misiri), Nigeria Customs na Mountain of Fire & Miracles (Nigeria), Friend’s Basketball Association (Côte d’Ivoire), ASB Makomeno na CNSS (RDC), Ferroviario Maputo (Mozambique) na FAP (Cameroun).

Iri rushanwa rihuza amakipe yabaye aya mbere mu duce aherereyemo, rikaba urubuga rwo kwerekana impano, gukomeza ubufatanye bw’ibihugu by’Afurika no guhatanira ishema kuri buri kipe.

Guhagararirwa n’amakipe abiri, APR WBBC na REG WBBC, ni ikimenyetso cy’uko Basketball y’abagore mu Rwanda igenda itera imbere. Mu gihe APR WBBC ifite intego yo gushimangira ubuhangange bwayo ku ruhando mpuzamahanga, iyi mikino itanga n’amahirwe ku Rwanda yo kugera kure kurushaho muri Basketball ku Mugabane wa Afurika.

APR WBBC yazanye Kierstan Bell ukinira Las Vegs Ices muri WNBA