Police yo muri Espagne yatangaje ko yataye muri yombi abafana batatu bakoreye ivanguraruhu abakinnyi b'ikipe ya FC Barcelona, Raphinha na Lamine Yamal ku mukino banyagayiyemo Real Madrid.
Aba bakinnyi barikorewe ubwo bishimiraga igitego cya 3 muri 4-0 batsinze Real Madrid. Lamine Yamal na Raphinha batutswe n'abafana babereka ko ari abirabura ndetse bakaririmba n'indirimbo zumvikabamo irondaruhu.
Nyuma y'ibi, La Liga yahise itanga ikirego muri Police yo muri Espagne nayo ihita itangira gukorera iperereza ishaka aba bafana none kuri uyu wa Gatandatu taliki ya 23 Ugushyingo yatangaje ko yafashe batatu bakoze iki cyaha cy'irondaruhu.
Mu itangazo yashyize hanze yagize iti: "Batatu batawe muri yombi bazira ibitutsi by'ivangura batutse abakinnyi babiri b'umupira w'amaguru mu mukino wo kuri Clásico. Abafashwe bavuze amagambo atubahiriza icyubahiro n’ubusugire bw’abakinnyi bombi".
Iri tangazo rikomeza rivuga ko aba batawe muri yombi hagendewe ku byatanzwe mu kirego cya Laliga ndetse na raporo y'inzobere mu kureba ibyavuzwe n'iminwa ndetse ko Laliga ikomeje kurwana ngo irandure ivanguraruhu.
Ati: "Abatawe muri yombi bakurikira ikirego cyatanzwe na LaLiga, cyatanze amajwi y'ibyabaye na raporo y’inzobere mu gusoma ibyavuzwe n'iminwa kuri polisi. Muri LaLiga, dukomeje kurwana kugira ngo turandure ivanguraruhu imbere ndetse no hanze y'umupira w'amaguru".
Muri shampiyona ya Espagne bakomeje kurwanya irondaruhu nyuma y'uko umukinnyi wa Real Madrid, Vinicius Junior yagiye arikorerwa cyane kuva yagera muri iyi kipe muri 2017.
Aba bafana batawe muri yombi baje bakurikira batatu ba Valencia bakatiwe gufungwa amezi 8 nyuma yuko bari bakoreye irondaruhu Vinicius Junior.
Police yo muri Espagne yataye muri yombi abafana bakoreye ivanguraruhu Lamine Yamal na Raphinha
Eng
RSS 
TANGA IGITECYEREZO