Imbamutima za Ole Gunnar Solskjaer ku kugaruka muri Manchester United

Ole Gunnar Solskjaer wamamaye akinira ndetse anatoza Manchester United, yagaragaje ko yiteguye kuyigarukamo mu gihe iyi kipe itorohewe n'ibihe bibi yagaragaza ko imushaka. 

Ibi abitangaje mu gihe abakunzi ba Manchester United basa n'aho batakishimiye umutoza Eric Ten Hag, cyane ko yatangiye nabi Shampiyona y'u Bwongereza "English Premier League 2024-25" ndetse akaba yaratangiye imikino ya Europa League anganya na Twente mu rugo kuri Old Trafford. 

Kugeza ubu, Manchester United ya Eric Ten Hag imaze gutsindwa imikino ibiri ya shampiyona, itsinda indi ibiri, ndetse inganya umwe, ubu iri ku mwanya wa 11 muri Shampiyona y'u Bwongereza. 

Nubwo Eric Ten Hag atakishimiwe muri Manchester United, mu mpeshyi yongereye amasezerano ye muri iyi kipe, imyaka ibiri yongereye yaje isanga umwe yari asigaje mu masezerano, ubu afite imyaka itatu muri Manchester United. 

Ubwo yaganiraga n'ikinyamakuru Q&A Ole Gunnar Solskjaer yabajijwe niba yakwemera kugaruka muri Manchester United iramutse imwitabaje.

Yagize ati: "Akenshi ntabwo nkunda kuvuga ku kazi kanjye, gusa isaha iyo ariyo yose Manchester United yankenera, navuga yego."

Muri 2018 Ole Gunnar Solskjaer yageze muri Manchester United ubwo mu gusimbura Jose Mourinho wari umaze kwirukanwa. Muri 2021 nawe yarirukanwe aho yahise asimburwa na Ralf Rangnick. 

Ole Gunnar Solskjaer yatangaje ko igihe cyose Manchester United yagaragaza ko imushaka yabyemera yiruka