FPR
RFL
Kigali

Abafana ba Rayon Sports barasabwa kwigurira Muhire Kevin

Yanditswe na: Aloys Niyonyungu
Taliki:18/06/2024 12:31
0


Ikipe ya Rayon Sports yatangije ubukangurambaga yise 'Ubururu bwacu agaciro kacu' busaba abafana bayo gukusanya Miliyoni 40 yo kugura Muhire Kevin wasoje amasezerano.



Ni mu butumwa iyi kipe yambara Ubururu n'Umweru yanyujije ku mbuga nkoranyambaga zayo kuri uyu wa Kabiri taliki ya 18 Kamena 2024.

Iyi kipe yavuze ko Ubuyobozi bw’abafana ba Rayon Sports bwihaye intego yo kwigurira umwana w'ikipe, Muhire Kevin mu gikorwa ngarukamwaka “UBURURU BWACU AGACIRO KACU".

Rayon Sports yavuze ko gahunda ari ugukusanya Miliyoni 40 z'amafaranga y'u Rwanda inashyiraho aho aya mafaranga azajya anyuzwa haba ku bana bayo bari imbere mu gihugu ndetse no hanze yacyo.

Ku bari mu Rwanda bazajya bawunyuza kuri 'MoMo Code' ya Rayon Sports. Amakuru avuga ko Muhire Kevin azongerwa amasezerano y'imyaka 2 agahabwa izi miliyoni 40 ubundi akajya ahembwa Miliyoni 1 n'ibihumbi 500 ku kwezi.

Ntabwo ari ubwa mbere abafana ba Rayon Sports baba biguriye umukinnyi kuko no mu mpeshyi y'umwaka ushize barabikoze ku munya-Uganda, Joakim Ojera bakusanya miliyoni 25 z'amafaranga y'u Rwanda. 

Icyo gihe bamusinyishije amasezerano y'umwaka 1 gusa bigeze mu kwezi kwa mbere muri uyu mwaka ahita yerekeza muri Al Mokawloon Al Arab SC yo mu Misiri atanzweho miliyoni 20 z'amafaranga y'u Rwanda.








TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND