RFL
Kigali

Mbazi basangira, umwe arara mu rugo rw’undi! Uko X-Dealer na The Ben bari inshuti z’akadasohoka- VIDEO

Yanditswe na: Janvier Iyamuremye
Taliki:13/06/2024 10:11
0


Umuraperi Ntakirutimana Joel yatangaje ko yatunguwe no kubona ikirego cya Mugisha Benjamin [The Ben] ashinja Ndagijimana Eric [X-Dealer] kumwiba telefoni yo mu bwoko bwa iPhone 14 Prox Max, kuko imyaka irenze 10 abazi nk’inshuti z’akadasohoka, ndetse ngo si rimwe si kabiri umwe yaraye mu rugo rw’undi.



Yabigarutseho mu kiganiro cyihariye yagiranye na InyaRwanda, nyuma y’uko kuri uyu wa Gatatu tariki 12 Kamena 2024, umuvandimwe we agize umwere ku cyaha cyo kwiba yari amaze hafi amezi acyenda akurikiranyweho. Iki cyaha giteganwa kandi kigahanishwa ingingo ya 165, 166 z’itegeko No 68/2018 ryo ku wa 30/08/2018 riteganya ibyaha n’ibihano muri rusange.

Kopi y’urubanza ifitwe na InyaRwanda, igaragaza ko ku wa 5 Ukwakira 2023, ari bwo The Ben yatanze ikirego mu bugenzacyaha asaba ko telephone ye yo mu bwoko bwa iPhone 14 Pro Max yibiwe mu gihugu cy’u Burundi yashakishwa igafatwa ndetse akaba acyeka ko yibwe n’uwitwa Ndagijimana Eric uzwi ku izina rya X Dealer.

Ngo ni nyuma yuko yicaye mu mwanya we ubwo yari yasize telephone ye akajya kuri stage mu gitaramo cyiswe Meet and Greet cyabereye mu mujyi wa Bujumbura mu ijoro ryo ku wa 1 Nzeri 2023 rishyira tariki 01 Ukwakira 2023 hanyuma X Dealer ngo akaza kwicara mu mwanya we akayitwara ndetse agahita agaruka mu Rwanda tariki 01 Ukwakira 2023.

Ibi byemezwaga n’uko iyo telephone yaje kugaragara kuri iyo tariki irimo gukoresherezwa mu Rwanda, mu karere ka Nyarugenge i Nyamirambo ahazwi nko kwa Mutwe ari na ho X Dealer atuye.

X Dealer yaburanye ahakana icyaha aregwa akavuga ko atigeze yiba telephone ya The Ben, kuko iyo aza kuba yarayibye hari camera zari kuba zigaragaza amashusho yerekana uburyo yibyemo iyo telephone, kandi ngo hari hari n’abashinjwe umutekano (bouncers) barinda The Ben ndetse n’umugore we yari ahari kuburyo baba baramubonye yiba iyo terephone.

Nyuma yo gusesengura ingingo zose, kuri uyu wa Gatatu tariki 12 Kamena 2024, urukiko rw’ibanze rwa Nyarugenge ‘rwemeje ko ikirego cy’ubushinjacyaha ntashingiro gifite’ kandi ‘Rwemeje ko Ndagijimana Eric adahamwa n’ icyaha cyo kwiba’.

Urikiko rwavuze ‘ko amagarama y’ urubanza aherera mu isanduku ya leta’ kandi rwibutsa ababuranyi ko kujuririra uru rubanza bikorwa mu gihe kitarenze iminsi 30 rusomwe.

Amashimwe ni yose kuri X Dealer!

Mu kiganiro n'itangazamakuru, X Dealer yagaragaje ko yanyuzwe n'ibyemezo byafashwe n'urukiko rwa Nyarugenge, kuko yari amaze amezi acyenda ‘yambaye icyasha’.

Uyu musore yashimye Imana, umuryango we, inshuti ze, umunyamategeko n'abandi bamufashije kugeza ubwo uru rubanza rupfundikiwe.

Yagaragaje ko atiteguye kwiyunga na The Ben, cyeretse 'amupfukamiye', kuko yababajwe no kujya gufungirwa muri Gereza ya Mageragere arengana.

Ati: "Ndishimye meze neza cyane! Urabona ko ibintu bimeze neza cyane. Urumva kuba ushinjwa ibintu utakoze, nawe nk'uko niyumvaga nawe wagerageza kubyumva, byari ibintu by'igisebo, nari narambaye urubwa. Kumwe bavuga ngo ntawe usaza adasebye."

Akomeza ati "Ndashimira ubutabera bw'u Rwanda, kuko butanze umucyo kuri iki kintu kandi ntekereza ko ntutanyuzwe yemerewe kujurira. Nibashyiremo akabaraga." X Dealer yavuze ko atiyumvisha ko The Ben yajurira kuko 'nawe azi ukuri'.

Byatangiye gute?   

Ntakirutimana Joel asanzwe ari umuraperi, ndetse mu minsi iri imbere ari kwitegura gushyira hanze indirimbo zubakiye ku mudiho wa Hip Hop. Ni umuvandimwe wa X Dealer, kuko hagati yabo hacamo umwana umwe.

Bombi bavukiye kandi bakurira mu Karere ka Gisagara mu Majyepfo y'u Rwanda, ariko baza kwisanga mu Mujyi wa Kigali, mu rugendo ruherekejwe n'umuziki.

Uyu musore asobanura ko Mukuru we X Dealer yamubereye akabando yicumba, ku buryo byinshi yagezeho abimucyesha. Asobanura ko muri iki gihe ari umwogoshi muri Saloon ya Clipper Zone, kandi ni umwuga umutunze, ku buryo ari nabyo byamufashije kwiga amashuri yisumbuye.

Yabwiye InyaRwanda, ko yishimiye icyemezo urukiko rwafashe. Ariko kandi yibuka inzira yanyuranyemo n'umuvandimwe we amusura muri gereza ndetse n'ahandi yafungiwe.

Avuga ko yatunguwe no kubona The Ben ashinja umuvandimwe kumwiba telefoni, kandi ari abantu basangiye, rimwe na rimwe bakararana.

Ati "Ntabwo nabasha kubyakira ubu, kuko birandenze [...] Icyo nakora aha ni ukugaya, buriya inshuti tuzigira ari nyinshi ariko hari igihe usanga icyo wari utegereje gusarura ku muntu gihabanye cyane n'icyo azakugaragariza mu hazaza hawe."

Akomeza ati "Kuko njye uyu mugabo X Dealer muzi kuva cyera ari inshuti ya The Ben magara, mu myaka nk'umunani ishize, ari inshuti magara. 

Ari wa muntu umusura mu rugo bagasangira, akaba ari wa muntu wagira gutya ngo amasaha aramfashe, bakaba banarara, ahubwo mukanasangira, bikaba ngombwa ko murara kwa The Ben cyangwa X Dealer."

Yavuze ko aba bombi babaye inshuti z'akadasohoka, kuko ibyabo byari byararenze ubushuti, ahubwo 'bari barabaye abavandimwe'. 

Uyu musore avuga ko yatunguwe bikomeye no kubona The Ben yemera ko X Dealer afungirwa i Mageragere. Ati "Byarambabaje Pe!"

Yagaragaje ko The Ben ashobora kuba yaragize inshuti zamugiriye inama zitari nziza, byatumye atanga ikirego arega X Dealer mu gihe yari azi neza ko icyo cyaha ntacyo yakoze.  


Tariki 5 Ukwakira 2023, ni bwo The Ben yatanze ikirego ashinja X Dealer kumwiba telefoni


Umuraperi Ntakirutimana [B2K- Uri iburyo] yatangaje ko yatunguwe n'ikirego cya The Ben, kuko ari amuzi nk'umuvandimwe w'umuryango w'abo 


B2K yatangaje ko mu myaka umunani ishize, X Dealer na The Ben bari inshuti z'akadasohoka  

KANDA HANO UREBE IKIGANIRO TWAGIRANYE N'UMUVANDIMWE WA X DEALER AKOMOZA KU MIBANIRE

">






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND