Icyishe Angus Cloud cyamenyekanye

Raporo ya coroner ya Californiya yasanze umukinnyi wa filime, Euphoria Angus Cloud, yarapfuye azize kunywa inzoga n’ibiyobyabwenge birengeje urugero.

Muri Nyakanga, nibwo humvikanye inkuru y’inshamugongo by’umwihariko ku bakunzi ba filime, ivuga ko uyu musore w'imyaka 25 y'amavuko yabonetse yashizemo umwuka aho yari ari mu rugo iwabo muri Oakland.

Cloud yitabye Imana azize uruvange rw’ibiyobyabwenge birimo methamphetamine, fentanyl, kokayine na benzodiazepine, nk'uko ibiro bishinzwe umutekano mu ntara ya Alameda County byabitangarije NBC News.

Nyuma y'urupfu rwe, nyina wa Cloud abinyujije ku mbuga nkoranyambaga yavuze ko yizera ko umuhungu we "atagambiriye kurangiza ubuzima bwe", avuga ko mu masaha make yabanjirije urupfu rwe, yari arimo kuvuga ku mishinga ye n'umuryango we.

Umuryango we kandi wavuze ku ntambara yarwanye ijyanye n’ubuzima bwo mu mutwe, aho wagize uti: "Turizera ko urupfu rwe rugiye kwibutsa abandi ko batari bonyine kandi ko batagomba kurwana intambara bonyine bucece."

Uyu mukinnyi wa filime yitabye Imana n’ubundi amaze iminsi mu gahinda k'urupfu rwa se wari umaze iminsi nawe apfuye azize mesothelioma (ubwoko bwa kanseri) aho yari yagiye muri Irilande kumushyingura icyumweru kibanziriza urupfu rwe.

Nyuma y'urupfu rwe, ibyamamare byinshi byagize ubutumwa bishyira hanze harimo n’umwanditsi wa Euphoria, Sam Levinson, wagize uti: "Nta muntu wari umeze nka Angus". 

"Yari umuntu udasanzwe, ufite impano cyane kandi yari muto cyane ku buryo tutiyumvisha uburyo adusize vuba. Yararwanye, kimwe na benshi muri twe, yari yarabaswe no kwiheba.

"Nizere ko yari azi umubare w'abantu yakoze ku mutima. Namukundaga. Nzahora mukunda iteka. Naruhukire mu mahoro kandi Imana ihe umugisha umuryango we."