RFL
Kigali

Musanze: Abana 139 bahawe impamyabumenyi mu rurimi ry’Igifaransa-AMAFOTO

Yanditswe na: Kwizera jean de Dieu
Taliki:21/03/2023 18:39
0


Ku ishuri rya Excel International Academy habereye ibirori byo gutanga impamyabumenyi ku banyeshuri bakoze ibizamini bya DELF (Diplôme d’études en langue Française).



Ibi birori byabaye mu masaha y’igicamunsi cyo kuwa Mbere tariki 20 Werurwe 2023 mu Karere ka Musanze. Ni ibirori byabanjirijwe n’akarasisi k’abana biga mu mashuri ya Excel School na Excel International Academy aherereye mu Karere ka Musanze. 

Aba banyeshuri basusurukije cyane abitabiriye ibi birori barimo; Bwana Dr. Geoffrey Mushaija, Umunyamabanga Nshingwabikorwa w’Intara y’Amajyaruguru, Bwana Nzigira Fidele ushinzwe uburezi mu karere ka Musanze, Bwana Rulinda Nathan, Umuyobozi wa Excel schools n’abandi.

Excel Schools igizwe n’amashami ane ariyo; Excel School, Excel Karwasa, Excel Gahunga Modern, aya mashami akoresha integanyanyigisho yo mu Rwanda ndetse na Excel International Academy ikoresha Integanyanyigisho yo mu Bwongereza izwi nka Cambridge.


Ibi birori byari biyobowe n’abarimo umwana wiga kuri iri shuri wavugaga neza ururimi rw’Igifaransa agaragariza ababyeyi ko amafaranga batanga adapfa ubusa. Abana bagize itorero Inkumburwa za Excel School basusurukije abantu mu ndirimbo no mu mbyino Nyarwanda batorejwe kuri iri shuri maze bishimirwa na buri wese. 

Babinyujije no mu muvugo, bagaragaje uburyo bashimira abarimu n’ubuyobozi bw’ibigo bigaho kuri gahunda ya DELF yabafashije kumenya ururimi rw’Igifaransa kugeza ubwo babonye ‘Diplôme’ zihamya ubushobozi bafite muri urwo rurimi.

Umwe mu babyeyi barereye kuri iri shuri rya Excel School ndetse n’umwana we akaza gutsinda ikizamini cya DELF maze diplôme ya DELF ikamufasha kujya kwiga hanze y’igihugu, yashimiye ubuyobozi bwa Excel School na Excel International Academ, ashimangira ko ubwo umwana we yageraga hanze y’igihugu aho yari agiye kwiga, ururimi rw’Igifaransa yari azi rwatumye bamwimura umwaka umwe ajya mu mwaka ukurikiye kandi akomeza kwitwara neza.

Yagize ati: "Iyi Porogaramu ya DELF Prim irareba abana bose by'umwihariko abo mu Majyaruguru kuko nibo begereye iri shuri rifite aya mahirwe. Iyi Porogaramu yanafashije umwana wanjye gutegura ikizamini cya Leta gisoza umwaka w'amashuri yari agezemo amasomo yose arayuzuza.

Yakoze ikizamini cya Delf Prim kiramufasha cyane kugeza ubwo yageze hanze y’igihgu aho yari agiye kwiga, agasanga ibyo yagombaga guheraho byose yarabirangije bikaba ngombwa ko azamurwa muwundi mwaka amafaranga twagombaga gutanga nk’ababyeyi tukayishyura undi mwaka.

Ku bw’ibyo rero ndasaba ababyeyi mwese muri hano, mbatuma no kubandi byeyi ndetse n'abaturanyi banyu kugira ngo mubabwire bazane abana bige iyi Porogaramu ya Delf Prim kuko ninziza cyane ku mwana”.

Uyu mubyeyi yasoje asaba ko nabo bashyirirwaho uburyo bwo kwiga ururimi rw’Igifaransa binyuze muri iyi gahunda. Ati: ”Natwe nk'ababyeyi ndetse n'abandi bantu bakuru mutuzanire iyi Porogaramu kugira ngo tubashe kwiga kandi dukore iki kizamini natwe dutere imbere".

Mu ijambo rye, Bwana Nzigira Fidele, Umuyobozi ushinzwe uburezi mu karere ka Musanze wari unahagarariye umuyobozi w’akarere muri ibi birori, yashimiye ishuri rya Excel School ku bwo kwitanga rikazana iyi gahunda yabaye inyamibwa kubana. Yagize ati: ”Turashimira iri shuri ryazanye iyi gahunda mu bana bacu ndetse n'abandi bafasha abana bacu gukomeza kwiga uru rurimi.

Iri shuri riri gushyira mu bikorwa intego z'igihugu zo gushyigikira ururimi rw'Igifaransa ruri mu ndimi zikoreshwa mu gihugi cyacu cy'u Rwanda. Nk'ubuyobozi bw'Akarere ka Musanze tuzakomeza kubafasha uko dushoboye mu rwego rwo gukomeza gufasha no guteza imbere ururimi rw'Igifaransa muri rusange".

Ibi byashimangiwe n’uwari ahagarariye Umuyobozi w’Intara y’Amajyaruguru bwana Bwana Dr. Geoffrey Mushaija wasabye ababyeyi kujya bita kuburere bw’abana babo ubwabo aho kureresha abana abakozi bakabegurira inshingano zose.

Umuyobozi w’ibigo bya Excel School ndetse na Excel International Academy, bwana Rulinda Nathan yagaragaje ko bishimira intambwe bateye avuga ko ari nziza asaba ababyeyi bose kuzana abana babo kwiga ururimi rw’Igifaransa nk’umusingi wo gukomeza gufasha uburezi bw’abana babo.

Yagize ati:”Nibyo uyu munsi aba bana basoje amasomo muri gahunda ya Delf Prim, babonye impamyabumenyi zabo kandi barabikoreye kuko bakoze iyo bwabaga kimwe n’abarimu bacu.

Ntabwo byari byoroshye kuko byadusabye kubanza gutegura abarimu, tubaha amahugurwa nyuma dukurikizaho igikorwa nyirizina cyo kwigisha abana kandi bimaze kugaragara ko byatanze umusaruro nk’uko namwe mwabibonye. Uyu munsi rero ndongera gusaba ababyeyi kuzana abana babo muri Excel School ndetse na Excel International Academy kugira ngo bige uru rurimi kimwe n’andi masomo dutanga”.

Abana bahawe izi mpamyabumenyi ni abana 139 barangije ibyiciro bitatu A1.1, A1 na A2 muri gahunda ya DELF Prim iri mu kigero cyabo.

Umwe mu bana baganiriye na InyaRwanda.com, yagaragaje ko amasomo bahawe azakomeza kubagirira akamaro no mu yandi masomo biga umunsi ku munsi ndetse ko bizanabafasha igihe cyose ababyeyi babo baba bahisemo kwerekeza mu mahanga cyane cyane mu gihugu cy’u Bufaransa.

Uyu muhango wo gushyikiriza impamyabumenyi kuri aba bana wahuriranye n’umunsi mpuzamahanga w’umuryango w’ibihugu bikoresha Igifaransa (OIF) wizihizwa buri mwaka tariki 20 Werurwe, ukaba wizihirijwe muri iki kigo cya Excel International Academy abenshi bita Excel Cambridge giherereye mu karere ka Musanze, Umurenge wa Muhoza, Akagari ka Ruhengeri, Umudugudu wa Muhe.



Aba bana basusurukije imbaga y'abari bitabiriye ibirori

Umubyeyi wavuze ijambo ahagarariye abandi


Uwayoboye umuhango wo gutanga impamyabumenyi

Aba bana bari bizihiwe

Nyuma hafashwe ifoto y'urwibutso


AMAFOTO: Kwizera Jean de Dieu - InyaRwanda.com






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND