RFL
Kigali

Mauritania: Imfungwa enye zo mu mitwe y'iterabwoba zatorotse gereza zishe abarinzi

Yanditswe na: Dushime Nina Cynthia
Taliki:7/03/2023 15:50
0


Ubuyobozi bwa Mauritania bwatangaje ko ku Cyumweru, imfunywa enye zo mu mitwe y'iterabwoba ya Jihad, zatorotse gereza yo mu murwa mukuru Nouakchott, zigasiga zishe abacunga gereza babiri.



Minisiteri ishinzwe umutekano muri Mauritania, yashyize hanze itangazo rigira riti "Ingabo z'igihugu zakajije umutekano kuri gereza, ndetse batangiye gukurikirana abatorotse kugira ngo bafatwe vuba bishoboka."

Nyuma yo gutoroka kw'aba bayisiramu, byabaye ku cyumweru, mu ma saa tatu za n'ijoro, Minisiteri yasabye abantu gutanga amakuru ayo ariyo yose ashobora gufasha mu guta muri yombi izi mfungwa zatorotse.

Umwe mu basirikare utatangajwe amazina yavuze ko izi mfungwa, ebyiri muri zo zari zarakatiwe igihano cy'urupfu, mu gihe abandi babiri bari bategereje kuburanishwa ibyaha birimo ibyo kuba mu mitwe y'iterabwoba.

Uyu muntu kandi yavuze ko imodoka yabo yayibonye mu majyaruguru y'uburasirazuba bwa Nouakchott. 

Nk'uko France24 ibitangaza, kuva mu mwaka wa 2011, nta bitero by'aba Jihad byigeze bigaragara muri Mauritania, kandi iki gihugu gihana imbibi na Mali aho izi nyeshyamba zatangiriye muri 2012, ndetse zikomeza gukwirakwira mu bihugu bya Sahel.

Uku kudaterwa kwa Maurtania n'iyi mitwe yiterabwoba y'abayisiramu byasobanuwe na Leta ya Amerika ko bishoboka ko hari amasezerano y'ibanga ari hagati yayo n'umurwa mukuru, Nouakchott.

Amerika yakomeje kuvuga ko yabonye inyandiko aho uwari umuyobozi wa Al- Qaed, Osama Bin Laden yiciwe muri 2011 - zivuga ko hari umugambi wo kugirana umubano hagati y'imitwe y'iterabwoba na guverinoma ya Maurtania muri 2010. Gusa ibi byose guverinoma y'iki gihugu yarabihakanye.






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND